მთავრობამ $500 მლნ-იანი ევროობლიგაციები დაფარა

ფინანსთა მინისტრის მოადგილის განცხადებით, 500 მლნ-იანი ევროობლიგაციები წინა კვირაში ბიუჯეტიდან დაიფარა.

"ვალის დაფარვა უკვე მოხდა. ტრანზაქცია გასულ კვირაში განხორციელდა. შესაბამისი თანხა გადაირიცხა ბიუჯეტიდან. რაც შეეხება ახალი ევროობლიგაციების გამოშვებას, ამ კვირაში შესაბამისი პროცედურები განხორციელდება და კვირის ბოლოს გამარჯვებული ინვესტორები გვეყოლება, რომლებიც შეისყიდიან ჩვენს ფასიან ქაღალდებს და მომდევნო კვირაში ჩამოირიცხება ის თანხები, რაც ახალი ობლიგაციების გამოშვებით უნდა მივიღოთ", - განაცხადა გიორგი კაკაურიძემ.

შეგახსენებთ, რომ $500 მლნ-ის ევროობლიგაციების განაღდების ვადა 2021 წლის აპრილი იყო. პანდემიის პერიოდში, 6.8%-ად განთავსებული საქართველოს სუვერენული ობლიგაციების შემოსავლიანობა გაზრდილი იყო, თუმცა ბოლოს ის გარკვეულწილად შემცირდა, ეს კი მთავრობას იმედს აძლევს, რომ რეფინანსირება უკეთესი პირობებით მოხდება.