"ფინანსური ტექნოლოგიების განვითარებისთვის ღია ბანკინგის დანერგვა ერთ-ერთი პირველი ამოცანაა"
ფინტეკ ასოციაცია ფინტეკ ინდუსტრიის ძირითად გამოწვევად საბანკო ინფორმაციაზე წვდომის პრობლემებს ასახელებს. როგორც დავით კიკვიძემ „ბიზნესპარტნიორთან“ საუბრისას განმარტა, ღია ბანკინგის დანერგვა ფინანსური ტექნოლოგიების განვითარებისთვის ერთ-ერთი პირველი ამოცანაა.
„ძირითადი გამოწვევა ის საბანკო ინფორმაციაა, რომელსაც ჯერჯერობით მონოპოლისტურად მხოლოდ კომერციული ბანკები ფლობენ. შესაბამისად, მნიშვნელოვანია ოუფენბანკინგის დანერგვა და ამ ინფორმაციასთან წვდომა ისე, რომ ამ კუთხით ფინტეკისთვის ბანკის ჩართულება აღარ იყოს აუცილებელი,“ - აღნიშნა დავით კიკვიძემ.
მისივე განმარტებით, ფინტეკ ასოციაციის პირველი ამოცანა საკანონმდებლო ბაზისა და ერთიანი თამაშის წესების ჩამოყალიბებაა.
„უნდა ჩამოყალიბდეს ერთიანი თამაშის წესები, რომელსაც ყველა დაექვემდებარება და მარეგულირებლისთვისაც იქნება მისაღები. მივდივართ იქით, რომ კონკრეტული მონახაზი გვქონდეს და მას აკმაყოფილებდეს ყველა სტარტაპი, რომელსაც ფინტეკის დარგში მონაწილეობის მიღების სურვილი ექნება. ფინანსური ტექნოლოგიები 2008 წლის შემდეგ აქტიურად განვითარდა მთელ მსოფლიოში და საკუთარი კაპიტალიზაციიდან, კომპანიების რაოდენობიდან და მოცულობიდან გამომდინარე ერთ-ერთ მსხვილ ინდუსტრიად ჩამოყალიბდა. ეს გლობალური ტრენდია და მნიშვნელოვანია, რომ საქართველომაც ამ კუთხით ფეხი აუწყოს. შესაბამისად, ჩვენი მიზანი სწორედ ის არის, რომ ბაზარზე ფინტეკ ეკოსისტემა შევქმნათ. აქტიურად ვითანამშრომლებთ როგორც ეროვნულ ბანკთან ისე სტარტაპებთან,“ - აღნიშნა დავით კიკვიძემ.
