დეპოზიტების დაზღვევის ვალდებულება მიკრობანკებზეც გავრცელდება
დეპოზიტების დაზღვევის ვალდებულება მიკრობანკებზეც გავრცელდება.
როგორც დეპოზიტების დაზღვევის სააგენტოს ხელმძღვანელმა ლევან თოდუამ „ბიზნესპარტნიორთან“ საუბრისას განმარტა, ახალი ფინანსური ინსტიტუტებიც, რომლებიც ბაზარზე სავარაუდოდ მალე გამოჩნდებიან, სააგენტოში სავალდებულო შენატანებს განახორციელებენ.
„მათაც ექნებათ სავალდებულო შენატანები დეპოზიტების დაზღვევის სააგენტოში. დაზღვეული დეპოზიტების ზღვარი კი იმავე პრინციპით გაიზრდება, როგორც საბანკო სექტორში. როგორც იცით, ჩვენ რისკზე დაფუძნებულ შენატანებს ვახორციელებთ. მიკრობანკებზეც ანალოგიური წესი გავრცელდება.
ვფიქრობ, დეპოზიტების დაზღვევის ვალდებულება მათთვის ბენეფიტი იქნება. პირველ ეტაპზე მიკრობანკებს, ჩემი აზრით, არ ექნებათ ისეთი ნდობა, როგორც უკვე აქვთ კომერციულ ბანკებს. შესაბამისად, როცა მოსახელობას ექნება ინფორმაცია, რომ მათი დეპოზიტები მიკრობანკებშიც დაზღვეულია, ისინი არ დაიწყებენ ფიქრს ღირს თუ არა, რომ დეპოზიტები ამ ფინანსურ ინსტიტუტში განათავსონ,“-აღნიშნა ლევან თოდუამ.
შეგახსენებთ, მიკრობანკების შესახებ კანონი ძალაში 1-ლი აპრილიდან 1-ელ ივლისამდე პერიოდში შევა. რაც შეეხება დეპოზიტების დაზღვევის ზღვარს, 2024 წლიდან დღეს არსებული 15 000 ლარიანი ზღვარი 30 ათას ლარამდე გაიზრდება.
