ქართლის ქარის ელექტროსადგურმა წლის I ნახევარში ₾9.4 მლნ-ის შემოსავალი მიიღო

„ქართლის ქარის ელექტროსადგურმა“ 2020 წლის 6 თვეში 9.4 მლნ ლარის შემოსავალი მიიღო.

გორთან მდებარე ქარის ელექტროსადგურის მფლობელის „საქართველოს კაპიტალის“ (GCAP) ინფორმაციით, ელექტროსადგურმა 46.6 გვტ.სთ გამოიმუშავა, რაც სიმძლავრის 51%-იან დატვირთვას ნიშნავს.

GCAP–მა ქარის ელექტროსადგურიდან 4.9 მლნ ლარის დივიდენდის მიღებაზეც განაცხადა.

საქართველოს პირველი ქარის ელექტროსადგური „საქართველოს კაპიტალმა“ 2019 წლის ნოემბერში 14.4 მლნ დოლარად იყიდა. 

შპს “ქართლის ქარის ელექტროსადგურის” ქონება 11 ჰექტარის ფართობის მიწის ნაკვეთისა და მასზე განთავსებული 6 ქარის ტურბინისგან (ტურბინის მოდელი: V117-91.5HH) შედგება, თითოეული ტურბინის სიმძლავრე 3.45-მეგავატია. 

სადგურის გამომუშავების წლიური საპროგნოზო მოცულობა 84 100 000 კვტ/სთ–ია. მთავრობასთან გაფორმებული ხელშეკრულებით, ესკო იღებს ვალდებულებას, 10 წლის განმავლობაში შეისყიდოს სადგურის მიერ გამომუშავებული ელექტროენერგიის 100%, კილოვატის დადგენილი ღირებულება $6.89 ცენტს შეადგენს. 

„საქართველოს კაპიტალი“ ქარის ახალი ელექტროსადგურების აშენებასაც გეგმავს.