პარლამენტში ყაზახურ-ქართულ ეკონომიკურ გაერთიანების საქმიანობის, ჩატარებული კვლვებისა და რეკომენდაციების მოსმენა გაიმართა
საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტში ყაზახურ-ქართულ ეკონომიკურ გაერთიანებასთან შეხვედრა გაიმართა, სადაც გართიანების საქმიანობის, ყაზახურ-ქართული ეკონომიკური თანამშრომლობის კვლევის შედეგები და რეკომენდაციები განიხილეს.
შეხვედრის მიზანს, საკანონმდებლო ორგანოსთვის ყაზახეთისა და საქართველოს ეკონომიკური და სავაჭრო ურთიერთობების მნიშვნელობის, ურთიერთობის გაღრმავებასთან დაკავშირებული გეგმების, ხედვებისა და სტრატეგიის გაზიარება და არსებული პოტენციალის შეფასება წარმოადგენდა.
დამსწრე საზოგადოებას საქართველო-ყაზახეთის ეკონომიკური თანამშრომლობის შესახებ კვლევის პრეზიტენცია თიბისი კაპიტალის კვლევების სამსახურის უფროსმა ირინა კვახაძემ წარადგინა. მნიშვნელოვანია, რომ კვლევა ყაზახურ-ქართული ეკონომიკური გაერთიანების და TBC კაპიტალის ერთობლივი ძალისხმევით ჩატარდა. შექმნილი დოკუმენტი 2021 წლისა და 2022 წლის პირველი კვარტლის სტატისტიკურ მონაცემებსა და ფაქტებს მოიცავს ვაჭრობის, ინვესტიციებისა და ტურიზმის მიმართულებით, რაც ყაზახეთსა და საქართველოს შორის მომავალი საქმიანობის ეფექტიანად განსაზღვრის, დაგეგმვისა და მართვის შესაძლებლობას იძლევა. კვახაძემ საქართველო-ყაზახეთის ეკონომიკური თანამშრომლობის შესახებ კვლევის პრეზიტენციის წარდგენისას აღნიშნა, რომ ევროკავშირთან დადებული ასოცირების და თავისუფალი ვაჭრობის შესახებ ხელშეკრულება შესანიშნავ პირობებს ქმნის ყაზახი ინვესტორებისა და პარტნიორების დაინტერესებისთვის.
"იმისათვის, რომ გავიგოთ თუ როგორ შეიძლება საქართველო-ყაზახეთს შორის არსებული ეკონომიკური პოტენციალის გამოყენება, ვფიქრობთ, რომ საჭიროა დავინახოთ ჯერ ეს პოტენციალი, მაგალითად ყაზახეთიდან საკვები პროდუქტების იმპორტის გაფართოების ნაწილში. ასევე, შესაძლებელია თუ არა, რომ საქართველო გახდეს ჰაბი და ეკონომიკური პარტნიორობა ამ თვალსაზრისით გამოიყენოს. გარდა ამისა, ძალიან მნიშვნელოვანია და ყველა ვხედავთ თუ როგორ გაიზარდა საქართველოს როლი სატრანზიტო დერეფანში. ასევე, მნიშვნელოვანია შიდა რეგიონული პოტენციალის გაანალიზება. იმისათვის, რომ ტურიზმი კიდევ უფრო გაძლიერდეს, მნიშვნელოვანია, რომ ტურიზმის პროფილი კარგად იყოს შესწავლილი, ზოგადი მონაცემები არ არის საკმარისი," – განაცხადა ირინა კვახაძემ.
კვლევის მიხდვით, საქართველოში ტურისტების შემოსვლის მიხედვით, ყაზახეთი ყველაზე მზარდი ქვეყნების ხუთეულშია. 2019 წლამდე აღნიშნულის მაჩვენებელი ყოველწლიურად საშუალოდ 26%-მდე იზრდებოდა. ეს მაშინ, როდესაც მხოლოდ 2 ავიაკომპანია, Air Astana და SCAT-ი დაფრინავდა 3 ქალაქიდან. 2021-ში დაემატა FlyArystan 5 ქალაქიდან, შესაბამისად ძალიან დიდი პოტენციალი არსებობს, რომ უახლოეს წლებში ტურისტების რაოდენობა ავიდეს 0.5 მლნ-მდე, რაც ყაზახეთის გამსვლელი ტურიზმის 5%-ია.
„სამწუხაროდ, ბოლო 2 წელია ტურიზმის ბიუჯეტში ყაზახეთი არაა გათვალისწინებული. ამასთან, ჩვენ შეიძლება ყაზახეთიდან გავზარდოთ ტურისტების ნაკადი, მაგრამ შემდეგ ინფრასტრუქტურის ან სხვა სერვისებით გამოწვეულმა უკმაყოფილებამ ისევ დაბალბიუჯეტიანი ტურისტების რანგში დაგვტოვოს. ახლა მნიშვნელოვანია ყაზახი ტურისტების პროფილის ზუსტი შეცნობა, იმის გაგება თუ რა სჭირდება ყაზახ ტურისტს. ეს უკვე სამომავლო პოლიტიკაა, უნდა დავგეგმოთ ისეთი საინვესტიციო პროექტები, რომელიც 3-4 წელში ტურისტთა ნაკადს შესაბამის ინფრასტრუქტურას დაახვედრებს," – განაცხადა ყაზახურ ქართული ეკონომიკური გაერთიანების (KGEU) გამგეობის თავმჯდომარემ და ყაზახეთის რესპუბლიკის საპატიო კონსულმა საქართველოში გიორგი ჯახუტაშვილმა.
ყაზახურ ქართული ეკონომიკური გაერთიანების (KGEU) გამგეობის თავმჯდომარემ ვაჭრობის, ტურიზმისა და ინვესტიციების მიმართულებით იმ მიგნებებსა და რეკომენდაციებზეც ისაუბრა, რომლის გათვალისწინებაც კიდევ უფრო გაარღმავებს ყაზახეთისა და საქართველოს ეკონომიკურ ურთიერთობებს. გაერთიანების ხელმძღვანელმა რამდენიმე რეკომენდაციაზეც გაამახვილა ყურადღება, რომლის შემდგომ შესრულებას საკანონმდებლო ორგანოსა და აღმასრულებელი ხელისუფლების ერთობლივი ძალისხმევა და მხარდაჭერა სჭირდება. კერძოდ, მნშვნელოვანია პარლამენტის და ეკონომიკური კომიტეტის მხარდაჭერა, რათა ორ ქვეყანას შორის არსებული საკითხების აქტუალიზაცია უფრო მეტად მოხდეს აღმასრულებელ ორგანოებსა და კერძო სექტორშიც.
„პროდუქციის მცირე მოცულობიდან გამომდინარე საქართველოც და ყაზახეთიც, ძირითადად, ნედლეულის ექსპორტს ახორციელებენ. სტაბილური ვაჭრობით საქართველოდან მხოლოდ ღვინო და არაალკოჰოლური სასმელები, ხოლო ყაზახეთიდან -მადნეული ხასიათდება, რაც სხვა პროდუქტების დაბალი კონკურენტუნარიანობის ან არასაკმარისად გააზრებული სავაჭრო მოდელის პირდაპირი მაჩვენებელია, როგორიცაა ხორბალი ყაზახეთიდან ან საკონსერვო ნაწარმი საქართველოდან. ასევე გასათვალისიწინებელია, რომ ყაზახეთის არც ერთი ძირითადი საექსპორტო კატეგორიის სტაბილური ექსპორტი არ ხორციელდება საქართველოს გავლით. ამავე დროს, საქართველოს მთლიანი ექსპორტის მხოლოდ 1-2% მოდის შუა აზიის 77მლნ მოსახლეობის მქონე ბაზარზე. ჩვენი მიზანი უნდა იყოს, პროდუქტების ცალკეული კატეგორიების ექსპორტის მოცულობის სტაბილური ზრდა (საკონსერვო, საკონდიტრო, წყლები, ლიმონათი, ხილი და ბოსტნეული, ღვინო), ასევე იმპორტის დივერსიფიკაცია და რისკების პრევენცია, კერძოდ, ხორბალის, გაზის, სასუქების, ნავთობ-პროდუქტების იმპორტირებისას. ამ მიმართულებით, აუცილებელია შემუშავდეს ორ ქვეყანას შორის და მათი გავლით ვაჭრობის ხელშეწყობის სტრატეგია და შესაბამისი სამოქმედო გეგმა, სტრატეგიის შესაბამისი სამოქმედო გეგმის განხორციელება და აღსრულების მონიტორინგი ორ ქვეყანას შორის სამთავრობოთაშორისი კომისიის ფორმატში უნდა განხორციელდეს,“ - განაცხადა ჯახუტაშვილმა. მისივე თქმით აუცილებელია გარკვეული სტრატეგიის და სამოქმედო გეგმის შემუშავება ტურიზმის მიმართულებითაც. რაც შესაძლებლობას იძლევა ყაზახი ტურისტი საქართველოს ეკონომიკის მრავალჯერადი კონტრიბუტორად ჩამოყალიდეს და სურვილი გაუჩნდეთ გახდეს ქართული კულტურისა და პროდუქტის მომხმარებელი ყაზახეთში. რაც შეეხება რეკომენდაციებს ინვესტიციების კუთხით, ჯახუტაშვილს მიაჩნია, რომ მნიშვნელოვანია, საქართველოს მხრიდან ცხადად უნდა ჩამოყალიბდეს საინვესტიციო საჭიროებები სექტორების მიხედვით (ტურისტული, სატრანსპორტო და სხვა ინფრასტრუქტურა რეგიონების მიხედვით) და უზრუნველყოფილი იყოს, რაც შეიძლება მეტი სრულად დამუშავებული საინვესტიციო პროექტი, რომელიც სრულყოფილი იქნება როგორც წინა მოსამზადებელი ეტაპებით, ასევე ფინანსური ინვესტიციის საჭიროებით.
საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარებ დავით სონღულაშვილმა ყაზახურ-ქართულ ეკონომიკურ გაერთიანებას ფლაგმანი უწოდა, ამასთან, სამაგალითოდ შეაფასა მისი საქმიანობა, მიზნები და ის მიგნებები და რეკომენდაციები, რომელიც გაერთიანების გამგეობის თავმჯდომარებ წარმოადგინა. ასევე განაცხადა, რომ საქართველოს და ყაზახეთის ეკონომიკურ ურთიერთობას დიდი ისტორია აქვს, რომელიც სამწუხაროდ ბოლომდე ათვისებული და გამოყენებული არ არის.
"შესაძლებლობები ნამდვილად დიდია, განსაკუთრებით დღევანდელ მოცემულობაში, რეგიონში არსებული გამოწვევებიდან გამომდინარე და ამაში ნომერი პირველი ამოცანა, ჩემი აზრით, არის რომ იყოს მაქსიმალური კოორდინირება როგორც ყაზახურ და ქართულ კერძო სექტორს შორის, ასევე სამთავრობო დონეზე. ქართულ-ყაზახური ეკონომიკური გაერთიანების მიგნებები ძალიან საინტერესო და მნიშვნელოვანია, დიდი სამუშაოებია ჩატარებული. ჩვენი მხრიდან დავგეგმავთ თუ როგორ განვავრცოთ, ვიმსჯელოთ ამ საკითზებზე და რა შეიძლება იყოს შემდეგი ნაბიჯები. კომიტეტი მზადაა მაქსიმალურად დაუჭიროს მხარი ქართულ-ყაზახური ურთიერთობების განვითარებას," – აღნიშნა დავით სონღულაშვილმა.
კომიტეტის მოსმენაზე ასევე ესწრებოდნენ სახელმწიფო სტრუქტურების, ბიზნეს ორგანიზაციების, საქართველოში ყაზახეთის საელჩოს და მედიის წარმომადგენლები, ეკონომიკის დარგის ექსპერტები, ყაზახურ-ქართული ეკონომიკური გაერთიანების დამფუძნებლები.
„ყაზახურ-ქართული ეკონომიკური გაერთიანება“ ყაზახურ-ქართული ბიზნესის ერთობლივი ინიციატივით, 2021 წლის მარტში დაფუძნდა. გაერთიანების დამფუძნებლები საქართველოში ყაზახური კაპიტალის მქონე კომპანიები, კერძოდ, „სილქ როუდ ჯგუფი“, „ხალიკ ბანკი საქართველო“, „კაპიტოლ ჯგუფი“, „ბათუმის ნავთობ ტერმინალი“ და GK Logistics არიან. აღნიშნულ ინიციატივას, ასევე, შეუერთდნენ ყაზახეთის რესპუბლიკის საელჩო საქართველოში, ავიაკომპანია „ეარ ასტანა“ და „რომპეტროლ საქართველო“. გაერთიანების გამგეობის თავმჯდომარე, წევრთა გადაწყვეტილებით, „კაპიტოლ ჯგუფის“ აღმასრულებელი დირექტორი და ყაზახეთის რესპუბლიკის საპატიო კონსული საქართველოში, გიორგი ჯახუტაშვილია, გენერალური დირექტორი კი, ნატალია ფედოსეევა გახლავთ. ორგანიზაციის მთავარ მიზანს ყაზახეთსა და საქართველოს შორის ეკონომიკური თანამშრომლობის გაღრმავება და სოციალურ-კულტურული ურთიერთობის განვითარების ხელშეწყობა წარმოადგენს. გაერთიანება ასრულებს ერთგვარი კომუნიკატორის როლს ორი ქვეყნის ბიზნეს სექტორის წარმომადგენლებს შორის და შუამდგომლობს მათ საჯარო სტრუქტურებთან.
