ეკონომიკა
31/07/2023
"მოვიაზრებთ, რომ საქართველოში შეიძლება ჩინეთიდან განხორციელდეს მნიშვნელოვანი ინვესტიციები"
ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა, რომელიც საქართველოს პრემიერ-მინისტრის ხელმძღვანელობით ჩინეთის სახალხო რესპუბლიკაში ვიზიტად მყოფი სამთავრობო დელეგაციის წევრია, ორი ქვეყნის მთავრობების ერთობლივი კომუნიკეს ძირითად ასპექტებზე ისაუბრა.
მისი თქმით, „საქართველოს მთავრობისა და ჩინეთის მთავრობის ერთობლივი კომუნიკე რამდენიმე განზომილებას მოიცავს. კომუნიკე აღნიშნავს, რომ საქართველოს ურთიერთობა ჩინეთის სახალხო რესპუბლიკასთან თანამშრომლობის ახალ ეტაპზე გადადის და ქვეყნებს შორის სტრატეგიული პარტნიორობა მყარდება“.
ვიცე-პრემიერის შეფასებით, სტრატეგიული პარტნიორობის დეკლარირება ძალიან მნიშვნელოვანი ნაბიჯია ორი ქვეყნის ურთიერთობებში და არაერთ ასპექტს მოიცავს - როგორც პოლიტიკურს, ისე ეკონომიკურ, სოციალურ, კულტურულ და საგანმანათლებლო მიმართულებებს. შესაბამისად, მისი შეფასებით, ეს არის კომპლექსური თანამშრომლობა ორ ქვეყანას შორის.
რაც შეეხება ეკონომიკისა და ბიზნესის მიმართულებით თანამშრომლობის საკითხებს, ლევან დავითაშვილი ინფორმაციით, მასაც ყოვლისმომცველი სახე აქვს და პრაქტიკულად, ქვეყნებს შორის ურთიერთობის ყველა პოტენციურ ასპექტს ფარავს.
„აქ საუბარია თანამშრომლობაზე როგორც ინვესტიციების მიმართულებით და ჩვენ მოვიაზრებთ, რომ საქართველოში შეიძლება ჩინეთიდან განხორციელდეს მნიშვნელოვანი ინვესტიციები სხვადასხვა დარგში, ასევე საუბარია თანამშრომლობაზე ტრანსპორტის, ლოგისტიკის, კავშირგაბმულობის სფეროებში. აქაც საუბარია ძალიან მჭიდრო თანამშრომლობაზე, რომელიც საშუალებას მისცემს ქვეყანას, რომ თავისი პრიორიტეტები სამი მიმართულებით განავითაროს - რომელიც უკავშირდება ქვეყნის გადაქცევას სატრანსპორტო და ლოგისტიკურ ჰაბად. მეორე - საქართველო შეიძლება იყოს ციფრული ჰაბი და ციფრული ეკონომიკის განვითარების კუთხით თანამშრომლობას აქვს განსაკუთრებული პერსპექტივები“, - აღნიშნა ვიცე-პრემიერმა.
ლევან დავითაშვილის განცხადებით, კომუნიკეში საუბარი შეეხება ქვეყნებს შორის თანამშრომლობას ენერგეტიკის მიმართულებით, რომლის თანახმად, საქართველო შეიძლება ენერგეტიკული ჰაბი იყოს. როგორც ვიცე-პრემიერმა განმარტა, საქართველოს განსაკუთრებული გეოსტრატეგიული მდებარეობა აქვს და ეკონომიკური განვითარების კუთხით ეს არის საფუძველი, მათ შორის ჩინეთის სახალხო რესპუბლიკასთან ეკონომიკური თანამშრომლობის კუთხითაც.
ლევან დავითაშვილის ინფორმაციით, საუბარი შეეხება ასევე ტურიზმის და ვაჭრობის სფეროში თანამშრომლობას. როგორც ის აღნიშნავს, რომ საქართველოსთვის ჩინეთი ერთ-ერთი მნიშვნელოვანი სავაჭრო პარტნიორია - ამ კუთხით დღეს ის მესამე ადგილს იკავებს, თუმცა, ყველა პოტენციალი აქვს, რომ საქართველოს ერთ-ერთი პირველი სავაჭრო პარტნიორი გახდეს - გაიზარდოს როგორც ექსპორტი, ისე იმპორტი და სავაჭრო ურთიერთობა ორივე ქვეყნის მხრიდან იქნას წახალისებული.
“საქართველოს აქვს თავისუფალი ვაჭრობის შეთანხმება ჩინეთის სახალხო რესპუბლიკასთან და ერთადერთი ქვეყანაა რეგიონში, რომელსაც აქვს როგორც ევროპასთან თავისუფალი ვაჭრობის რეჟიმი, ისე თავისუფალი ვაჭრობის შეთანხმება ჩინეთის სახალხო რესპუბლიკასთან. ასე რომ, ღვინის ექსპორტის თვალსაზრისითაც საქართველოსთვის ჩინეთი ძალიან პერსპექტიულია. პერსპექტიულია ასევე ავიამიმოსვლის კუთხით - აქაც საუბარი იყო იმაზე, რომ „ღია ცის“ ფარგლებში ჩვენ მეტი კავშირი გვექნება ჩინეთის სხვადასხვა ქალაქთან და შესაბამისად, ეს პირდაპირ შეუწყობს ხელს ტურისტულ ნაკადს, რაც, რა თქმა უნდა, მნიშვნელოვნად აისახება საქართველოს ეკონომიკურ კეთილდღეობაზე“, - განაცხადა ვიცე-პრემიერმა.
