ევა ბოჭორიშვილი ლარზე: არაორდინალური და გაბედული ნაბიჯების გადადგმაა საჭირო

Galt&Taggart-ის კვლევების დეპარტამენტის უფროსის განცხადებით, ლარის კურსზე ძალიან ბევრი ფაქტორი ნეგატიურად აისახება. ევა ბოჭორიშვილი მიიჩნევს, რომ არაორდინალური და გაბედული ნაბიჯების გადადგმაა საჭირო.

„ამ ეტაპზე რეზერვების აქტიურ ხარჯვას ვერ ავცდებით. არაორდინალური და გაბედული ნაბიჯების გადადგმაა საჭირო. ეს აუცილებელია იმისთვის, რომ ის მაკროეკონომიკური პარამეტრები რაც გვაქვს უფრო მეტად არ გაუარესდეს. ძალიან ბევრი ფაქტორია, რომელიც კურსზე უარყოფითად აისახება. მათ შორის ძალიან მაღალი ბიუჯეტის დეფიციტი, რასაც ემატება გაუარესებულ მოლოდინებთან დაკავშირებული ფაქტორები, პანდემიის მესამე ტალღის მოლოდინი, ტურიზმის აღდგენასთან დაკავშირებული ნეგატიური განწყობები და რა თქმა უნდა, მნიშვნელოვან როლს თამაშობს პოლიტიკური არასტაბილურობაც. ამ ფაქტორების ერთობლიობა კურსზე ნეგატიურად აისახება და ასეთ დროს ეროვნული ბანკის სწრაფი რეაგირება საკმაოდ მნიშვნელოვანია,“ - აღნიშნა ევა ბოჭორიშვილმა.

შეგახსენებთ, რომ ბოლო დღეების განმავლობაში ლარი უფასურდება. 30 მარტის ვაჭრობის შედეგად, 1 აშშ დოლარი 3.4118 ლარი გახდა. დოლარის ცვლილებამ ეროვნულ ვალუტასთან მიმართებაში 0.0272 შეადგინა.

2021 წლის დაწყებიდან დღემდე სებ-ს სულ $160 მლნ-ის ინტერვენცია აქვს განხორციელებული. COVID-ით გამოწვეული არასტაბილურობის ფონზე, ეროვნულმა ბანკმა პანდემიურ 2020 წელს პირდაპირი ინტერვენციების გზით სავალუტო ბაზარს სულ დაახლოებით $916 მლნ დოლარი მიაწოდა.