“ბედნიერები არ ვართ იმით, რომ  ფქვილის სუბსიდირება ხდება“ - ლევან სილაგავა

„ჩვენ ბედნიერები არ ვართ რომ  ფქვილის სუბსიდირება ხდება, არც მაშინ ვიყავით, როდესაც ხორბლის ფასის სუბსიდირება ხდებოდა, ისევე როგორც მეპურეებსაც არ უნდოდათ სუბსიდირება მათ სეგმენტში, იმიტომ რომ ჩვენ თავისუფალი ბაზრის მომხრეები ვართ“, - რატომ გადაწყდა ფქვილის და არა პურის ფასის სუბსიდირება ამ  დეტალებზე საქართველოს ხორბლისა და ფქვილის ასოციაციის აღმასრულებელმა  დირექტორმა  ლევან სილაგავამ „ბიზნესპარტნიორის ოთხეულში“ სტუმრობისას ისაუბრა.

ლევან სილაგავას თქმით, როდესაც საუბარია 10 000 ტონა ფქვილის ფასის სუბსიდირებაზე, გათვალისწინებულია ზედმეტობაც, რომ რისკების გადაზღვევა მოხდეს.

„რატომ წავიდა მთავრობა ფქვილის და არა პურის ფასის სუბსიდირებაზე? აქ არგუმენტი იყო ის, რომ  2500 საცხობის და პურის ქარხნის კონტროლი უფრო რთულია, ვიდრე 30-40 წისქვილკომბინატის“, - აღნიშნა სილაგავამ.

გადაცემაში საუბრისას აღინიშნა, რომ ძირითადი მოხმარების პურისთვის საჭირო ფქვილის რაოდენობის 1/3-ის დასუბსიდირებით მოხდა ის, რომ მასობრივად პურზე ფასის ზრდა არ მოხდება.  

 „დღეს გაიხსნა ინტერესთა გამოხატვა, რომელიც დასრულდება 9 დეკემბერს 2 საათზე, შემდეგ გამოცხადდება ტენდერი და ამ ტენდერს თანდართული ექნება იმ  პურის ქარხნების სია, რომლებმაც პირველი ხარისხის  ფქვილი უნდა მიიღონ 53 ლარად, რომ მათ გამოაცხონ პური, რომელიც არ გაძვირდება“, - განაცხადა სილაგავამ.

აღსანიშნავია, რომ საქართველოს ზოგადად სჭირდება თვეში 30 ათასი ტონა ფქვილი, აქედან  10 000 ტონა ფქვილის ფასის თანადაფინანსება მოხდება.