"ავარიული შენობების ჩანაცვლება განაშენიანების ინტენსივობის გაზრდის ხარჯზე დაუშვებელია"

ავარიული შენობების ჩანაცვლების პროცესში განაშენიანების ინტენსივობის კოეფიციენტის ზრდა დაუშვებელია. ამის შესახებ „ბიზნესპარტნიორთან“ საუბარში არქიტექტორმა ირაკლი როსტომაშვილმა განაცხადა.

მისი თქმით, შეცდომაა და მომავალში არაერთი პრობლემის წარმოქმნას უწყობს ხელს ის ნაბიჯი, როცა აღნიშნული კოეფიციენტი იზრდება, მათ შორის - ავარიული შენობების ჩანაცვლების მიზნით.

„სეისმური, კლიმატური პირობების და სხვა კრიტერიუმებით დადგენილია, რომ ერთ ჰექტარზე 280, არაუმეტეს 320 მოსახლე უნდა ცხოვრობდეს. შედარებისთვის ავიღოთ ლიფტი, რომელსაც აწერია, რომ 4 ადამიანზეა გათვლილი. მასში რომ 7 ადამიანი ჩაჯდეს, მათ სისოცხლეს საფრთხე დაემუქრება. ავიღოთ ვაჟა-ფშაველას გამზირი, სადაც პირობითად ცხოვრობს 10 ათასი ადამიანი. ამ 10 ათას ადამიანში 2 ათასი ბავშვია და მათ სჭირდებათ 2 სკოლა. მაგრამ თუ ამ რაიონში იქნება 30 ათასი მცხოვრები, მათ დასჭირდებათ 6 სკოლა, მეტი ტრანსპორტი, ეს ყველაფერი კი არ ვითარდება და არაა საკმარისი. კიდევ ერთი მაგალითი, თუ რატომაა დაუშვებელი განაშენიანების ინტენსივობის დადგენილი პარამეტრების გაზრდა: უჰანში პანდემიის დროს მაღალსართულიან კორპუსებში ვირუსი ძალიან სწრაფად ვრცელდებოდა, რადგან იქ ბევრი საერთო სივრცე, საერთო ლიფტია,“ - აღნიშნა ირაკლი როსტომაშვილმა.

რაც შეეხება მერიის მიერ დაანონსებულ, ძველ თბილისში მდებარე ავარიული შენობების რეაბილიტაციის ორ ახალ პროგრამას, როგორც როსტომაშვილმა განაცხადა, წარმოდგენილი მიდგომა და ის, რომ ამ საკითხს ყურადღება დაეთმო, მისასალმებელია, თუმცა რამდენად დაინტერესდება ბიზნესი - ეს კონკრეტულ შეთავაზებასა და მოლაპარაკებების დეტალებზეა დამოკიდებული.

თბილისის მერიის მიერ გუშინ წარმოდგენილი პირველი პროგრამის მიხედვით, ბიზნესისექტორს მესაკუთრესთან შეთანხმებით მიეცემა შესაძლებლობა ისტორიულ უბნებში არსებული ავარიული შენობა-ნაგებობის ჩანაცვლება ან რეაბილიტაცია მოახდინონ. გაწეული სამუშაოებისა და ჩადებული ინვესტიციების სანაცვლოდ კი მუნიციპალიტეტი სამშენებლო კომპანიას არაისტორიულ უბანში, მის საკუთრებაში არსებულ მიწაზე მშენებლობის განსხვავებულ პარამეტრებს შესთავაზებს. პარამეტრები ინდივიდუალურად შემუშავდება. დედაქალაქის მერის თქმით,  ახალი პროგრამების შემუშავება იმიტომ გახდა საჭირო, რომ, სხვა შენობებისგან განსხვავებით, კულტურული მემკვიდრეობის სტატუსის მქონე ნატებობების ჩანაცვლება ვერ მოხდება. 

პირველი პროგრამის  პარალელურად ამოქმედდება მეორე პროგრამა, რომელიც ბინის მესაკუთრეებს  შესაძლებლობას აძლევს, თბილისის მერიის ჩართულობით საკუთრებაში არსებული ქონება აუქციონის საშუალებით გაყიდონ. მესაკუთრეების მხრიდან ერთობლივი მიმართვის და თანხმობის შემდეგ, თბილისის მერია აზომავს უძრავ ქონებას და ქონების საბაზრო ღირებულებას ექსპერტიზის საფუძველზე დაადგენს.