"ზაკვოს" ნაცვლად მშენებარე ახალ მრავალფუნქციურ კომპლექსში 1კვ.მ-ის საშუალო ფასი $1500-ია
თბილისში, ამიერკავკასიაში საბჭოთა ჯარების ყოფილი შტაბბინის (ზაკვოს) ნაცვლად ახალ მრავალფუნქციურ კომპლექსში გაყიდვები შემოდგომიდან დაიწყება. 1 კვ.მ-ის ფასი საშუალოდ $1500-ია.
როგორც ცნობილია, მის ადგილზე ახალი საცხოვრებელი და ბიზნეს კომპლექსი (როგორც სავაჭრო, ისე საოფისე ფართები) უნდა აშენდეს.
IG Development-ის მიერ „თიბისი ბანკისგან“ გამოსყიდული შენობა თითქმის სრულად დანგრეულია. შენობა, რომელიც უნივერსიტეტის ქუჩაზე N2-ში მდებარებს, წლების განმავლობაში უფუნქციოდ იყო დარჩენილი.
როგორც IG Development-ის შვილობილი კომპანიის City Development-ის დირექტორმა სანდრო ტოგონიძემ „ბიზნესპარტნიორს“ განუცხადა, ამჟამად მუშაობა დეტალურ პროექტირებაზე მიმდინარეობს.
„პარარელურად ვგეგმავთ დავიწყოთ მიწის სამუშაოები, ოქტომბრიდან საცხოვრებელი ნაწილის გაყიდვებსაც დავიწყებთ. რაც შეეხება ბიზნეს კლასის მიმართულებას, ამ შემთხვევაში ალბათ მხოლოდ გაქირავება მოხდება,“-აცხადებს ტოგონიძე.
მისი ინფორმაციით, დაახლოებით 22 000 კვ.მ იქნება რეკრეაციული სივრცე, 11 000 კვ.მ - საზოგადოებრივი სივრცე. ტოგონიძის განმარტებით, საწყის ეტაპზე კომპანია პროექტში 120-150 მლნ დოლარის ინვესტიციას განახორციელებს.
ახალი კომპლექსის დასრულების ვადად კი 2026 წელია განსაზღვრული.
შეგახსენებთ, აღნიშნული ტერიტორია "თიბისი ბანკის" საკუთრებას წარმოადგენდა და იქ საფინანსო ინსტიტუტი სათაო ოფისის მშენებლობას გეგმავდა.
