ზაალ იაკობიძე: ტექინსპექტირების ცენტრები სულს ღაფავს
ტექდათვალიერების ცენტრებში მიმართვიანობა კრიტიკულ ნიშნულამდე შემცირდა. წლის ბოლოსთვის სავალდებულო პერიოდული ტექდათვალიერება ავტოპარკის ნახევარსაც არ გაუვლია. ამ ფონზე კი ბიზნესის დიდი ნაწილი გაკოტრების ზღვარზეა.
„ათეულობით კომპანია, რომელმაც ტექინსპექტირების ცენტრებში ინვესტიცია ჩადო სულს ღაფავს“ - განუცხადა „ბიზნესპარტნიორს“ „სენტა ოილის“ დამფუძნებელმა.
ზაალ იაკობიძის განმარტებით, პრობლემის სათავე კი 2019 წელს ამოქმედებული რეგულაციის აღსრულებაშია.
„სახელმწიფომ გამოუშვა რეგულაცია, რომ უნდა ყოფილიყო ტექდათვალიერებები მკაცრად რეგულირებადი. შემდეგ სხვადასხვა მოსაზრებით, ოფიციალურად თუ არაოფიციალურად ეს რეგულაციები შეასუსტეს. შედეგად მივიღეთ ის, რომ ათეულობით კომპანია, რომელმაც ამ საქმეში ინვესტიცია ჩადო ფინანსური პრობლემების წინაშე აღმოჩნდა. სახელმწიფოს მხრიდან აღარც ის მოთხოვნაა, რომ ყველა მანქანის მფლობელმა სავალდებულო ტექდათვალიერება გაიაროს და აღარც შესაბამისი ჯარიმა. ბევრი კომპანია ძალიან მძიმე დღეშია. ვერ ისტუმრებენ ბანკის ვალებს.
ეს ბიზნესი ხომ მხოლოდ სახელმწიფოს ინიციატივით და მოთხოვნის შედეგად დავიწყეთ?! რეალურად კი ხდება ის, რომ თავიდან შემოიღეს რეგულაცია. მოთხოვნის გამო, გაჩნდა ახალი ტექდათვალიერების ობიექტები, მაგრამ მათ, ვისაც რეგულაციის აღსრულება ევალებოდათ, მალევე მოუშვეს მუხრუჭები.
ჯარიმის გადახდის შიში აღარც იურიდიულ პირებს აქვთ და აღარც ფიზიკურ პირებს. ამ ყველაფრის ფონზე ცხადია, სფეროში ძალიან მძიმე მდგომარეობაა,“ - განაცხადა ზაალ იაკობიძემ.
