“უმალი“ თევზის ჩიფსების და პაშტეტის წარმოებას იწყებს

თევზის მწარმოებელი კომპანია „უმალი“ 1 თვეში თევზის ჩიფსებს, ხოლო სექტემბრის ბოლოდან თევზის პაშტეტის წარმოებას იწყებს.

როგორც კომპანიის აღმასრულებელი დირექტორი დიტო წვერავა „ბიზნესპარტნიორთან“ აცხადებს, ჩიფსები 60 გრამიან პარკებში გაიყიდება, პაშტეტი კი 80-100 გრამიან პოლიეთილენის პარკებში.

რაც შეეხება ფასს, კომპანიაში ამ დროისთვის კალკულაცია მიმდინარეობს და ის, თუ რა ფასად გაიყიდება წარმოებული პროდუქცია, მოგვიანებით გახდება ცნობილი.

წვერავას განცხადებით, ქარელის რაიონში წარმოებული თევზის ჩიფსები და პაშტეტები, ისევე როგორც კომპანიის სხვა პროდუქცია, „უმალის“ ბრენდით, საწყის ეტაპზე „ორი ნაბიჯის“ ქსელში გაიყიდება. სამომავლოდ კი დაგეგმილია, პროდუქციის სხვადასხვა სავაჭრო ქსელში რეალიზაციაც.

წვერავას ინფორმაციით, კომპანიამ პროექტში დაახლოებით მილიონი ლარის ინვესტიცია განახორციელა.

კომპანია „უმალი“ ბაზარზე 2017 წლიდან ოპერირებს. ის  სასოფლო-სამეურნეო პროდუქციის გადამამუშავებელი და შემნახველი საწარმოების თანადაფინანსების პროგრამის ბენეფიციარია.

საწარმოში ჯამურად 1,5 მლნ დოლარის ინვესტიცია განხორციელდა, აქედან, 249 081 დოლარი გრანტია, ხოლო 311 352 დოლარი შეღავათიანი აგროკრედიტი. 

უმალის“ დღიური წარმადობა 2.5 ტონაა. პროდუქციის გამოშვება სეზონურია და ზაფხულში შედარებით მცირდება.