უძრავი ქონების ეროვნული ასოციაცია: სექტორი ლიცენზირებას უნდა დაექვემდებაროს
უძრავი ქონების ბაზრის სპეციალისტები სექტორში არაპროფესიონალი კადრის პრობლემაზე საუბრობენ. საქართველოს უძრავი ქონების ეროვნული ასოციაციის სამეთვალყურეო საბჭოს წევრი ნატო ბოჭორიშვილი "ბიზნესპარტნიორთან" ამბობს, რომ სექტორში ამ მხრივ მძმე მდგომარეობაა და ამას ორი მიზეზით ხსნის.
პირველი, საკანონმდებლო კუთხით ეს არის შედარებით არარეგულირებული სფერო, განათლების თვალსაზრისით იქნება ეს თუ ლიცენზირების. როგორც ბოჭორიშვილი აღნიშნავს, ამაში სახელმწიფო ნაკლებად არის ჩართული, შესაბამისად, ბაზარზე უძრავი ქონების ბევრი კომპანია არსებობს.
„ვინც 1-2 წარმატებულ ტრანზაქციას განახორციელებს, თვლის, რომ თავისი კომპანია უნდა გახსნას. ბევრი არაპროფესიონალია ბაზარზე. როდესაც კომპანიას გიხდება ვაკანსიის გამოცხადება, პრობლემებიც მანდ იწყება. არიან ან არაკვალიფიციური, ან ადამიანები მცირედი კვალიფიკაციით და ისეთ ხელფასს ითხოვენ, რომელიც ფიზიკურად არ შეესაბამება რეალობას,“ - აცხადებს ბოჭორიშვილი.
საქართველოს უძრავი ქონების ეროვნული ასოციაციის სამეთვალყურეო საბჭოს წევრი შექმნილი სიტუაციიდან გამოსავალს სფეროს ლიცენზირებაში ან გარკვეული კუთხით რეგულირებაში ხედავს.
"საერთაშორისო ბაზარზე ამ მხრივ ბევრი პრეცედენტი არსებობს და ამ საკითხის მოგვრება რთული არ არის, როგორც კი სახელმწიფოს მხრიდან საჭიროება იქნება. ეს ძალიან შეცვლის უძრავი ქონების ბაზრის მდგომარეობას იმ კუთხით, რომ მომხმარებლები უფრო კმაყოფილები იქნებიან და ეცოდინებათ რა ტიპის სერვისის მიღება შეუძლიათ,“ - აცხადებს ბოჭორიშვილი.
