"თუ გვინდა განვითარებული ქვეყანა ვიყოთ, წამლის ხარისხის ლაბორატორია უნდა გვქონდეს"
საქართველოს ჯანდაცვის ჯგუფის გენერალური დირექტორის ნიკოლოზ გამყრელიძის განცხადებით, თუ გვინდა საქართველო განვითარებული ქვეყანა იყოს, აუცილებლად უნდა გვქონდეს წამლის ხარისხის ლაბორატორია.
„ძალიან კარგია, რომ ამ პროექტს საფუძველი ეყრება და განხორციელდება,“-აცხადებს გამყრელიძე jandacva.ge-სთან საუბარში.
კითხვაზე, იმ პირობებში, როდესაც დღეს არ არსებობს ქვეყანაში აღნიშნული ლაბორატორია, რა პრობლემების წინაშეა ქვეყანა და ვართ თუ არა ამ მხრივ დაუცველები, გამყრელიძე აცხადებს, რომ წამლის ლაბორატორიის არსებობის შედეგად ჩნდება დამატებითი ხარისხის კონტროლის მექანიზმი, ამისთვის კი მედიკამენტის სხვა ქვეყნის ლაბორატორიაში გადაგზავნა არ გიწევს.
შეგახსენებთ, პრემიერ-მინისტრმა ირაკლი ღარიბაშვილმა რამდენიმე დღის წინ განაცხადა, რომ აქტიურად მიმდინარეობს მუშაობა, რომ ქვეყანაში წამლის ხარისხის ლაბორატორია შეიქმნას.
"საქართველოში წარმოებული და იმპორტირებული მედიკამენტი უნდა იყოს მხოლოდ მაღალი ხარისხის. ჩვენ ამ პროცესს მაქსიმალურად გავაკონტროლებთ", - განაცხადა ირაკლი ღარიბაშვილმა.
