თბილისში ლითონის სამშენებლო კონსტრუქციებისა და ნაწილების საწარმო "როლფ ჯორჯია" გაიხსნა

თბილისში ლითონის სამშენებლო კონსტრუქციებისა და ნაწილების საწარმო "როლფ ჯორჯია" გაიხსნა.

კომპანია თბილისში მდებარეობს და მეტალის უჯრედულ შეკიდულ ჭერებს აწარმოებს. საწარმომ „აწარმოე საქართველოში“ პროგრამის ფარგლებში 170 000 ლარის სესხი აიღო, პროექტის ჯამური ინვესტიციის მოცულობამ კი 450 000 ლარი შეადგინა. ამ ეტაპზე 16 ადამიანია დასაქმებული, თუმცა კომპანიის მენეჯმენტის განცხადებით, მომავალში სამუშაო ადგილების გაზრდას გეგმავენ.

„სააგენტო „აწარმოე საქართველოში“ აგრძელებს მცირე და საშუალო ბიზნესის მხარდაჭერას. ამ ეტაპზე სააგენტოს პროგრამების ფარგლებში ჯამურად 1500-ზე მეტი პროექტია მხარდაჭერილი და სხვადასხვა პროგრამებით 2 მილიარდი ლარის საკრედიტო პორტფელის უზრუნველყოფაა განხორციელებული. „როლფ ჯორჯია“ ერთ-ერთი ასეთი საწარმოა, რომელიც „აწარმოე საქართველოში“ მხარდაჭერით შეიქმნა. მნიშვნელოვანია, რომ კომპანია წლების განმავლობაში ახორციელებდა ამ პროდუქციის იმპორტს საქართველოს ბაზარზე, თუმცა დღეს უკვე აქვს პოტენციალი, გავიდეს საექსპორტო ბაზრებზე“, - განაცხადა საწარმოს გახსნაზე ეკონომიკის მინისტრის მოადგილემ ირაკლი ნადარეიშვილმა.