სნეპ ფიტნესი: ოფიციალურად დავიკეტებით თუ არაოფიციალურად, არ აქვს მნიშვნელობა

„სნეპ ფიტნესის“ ქსელის დირექტორი, სოფო სოლოღაშვილი „ბიზნესპარტნიორთან“ გართულებულ ეპიდმიოლოგიურ მდგომარეობაზე საუბრობს და აცხადებს, რომ თუ სიტუაცია ასე გაგრძელდა, სპორტული დარბაზებიც არაოფიციალურად დაიხურებიან.

„თუ არ დაგვკეტავენ და ინფიცირების დღიური რაოდენობა 10 000-ზე ავიდა, ჩათვალეთ რომ დარბაზი ისედაც დაკეტილი იქნება, ვინ ივლის ასეთ სიტუაციაში? არ ექნება მნიშვნელობა სპორტულ დარბაზებს მთავრობა ოფიციალურად დახურავს თუ არა. პირველი ლოქდაუნის დროს, სანამ დაგვკეტავდნენ, ჩვენ მანამდე დავიხურეთ ზუსტად ამ მიზეზის გამო," - აცხადებს სოლოღაშვილი.

როგორც „სნეპ ფიტნესის“ ქსელის დირექტორი აცხადებს, ლოქდაუნს კომპანია არ განიხილავს, რადგან ფინანსურად ეს ძალიან დიდი დარტყმა იქნება.

„კომპანია ჯერჯერობით აგრძელებს ფუნქციონირებას, სადამდე შეძლებს ამას არ ვიცი,“ - აცხადებს სოლოღაშვილი.

მისივე განცხადებით, ზოგადად ზაფხული ინდუსტრიისთვის არააქტიური პერიოდია და მომხმარებელთა აქტივობა ისედაც შემცირებული იქნებოდა, თუმცა, კომპანიამ  ივნის-ივლისში იმაზე კარგად იმუშავა, ვიდრე ამის მოლოდინი იყო.

„ჩვენი თანამშრომლების 99% აცრილია, რაც შეეხება მომხმარებლებს, ამ შემთხვევაში იმდენად დაცულია დისტანცია, რომ ეს პრობლემას არ შექმნის, პირბადე აუცილებელი ატრიბუტია. მე ოპტიმისტური მოლოდინი მაქვს იმ თვალსაზრისით, რომ დღეს ამოქმედებული რეგულაციები იმოქმედებს და 2 კვირის შემდეგ ინფიცირების რაოდენობა განახევრდება, სექტემბერში კი მომზადებულები შევხვდებით ეპიდემიოლოგიურ სიტაუციას,“ - აცხადებს სოლოღაშვილი.

დღეის მდგომარეობით, „სნეფ ფიტნესს“ საქართველოს მასშტაბით 4 ფილიალი აქვს.