"სნეილ ქეჩი" ხობში ლოკოკინის ფერმას აფართოებს - წლიური წარმადობა 400 ტონა იქნება

კომპანია „სნეილ ქეჩი“ ხობში ლოკოკინის ფერმას აფართოებს.

როგორც ქართულ-ნორვეგიული კომპანია „სნეილ ქეჩის“ (ნადი გრუპის დაფუძნებული) თანადამფუძნებელმა მერაბ ნადარაიამ „ბიზნესპარტნიორს“ განუცხადა, წლის ბოლომდე ხობში დაგეგმილია არსებულ 6 ჰა-ზე გაშენებულ ფერმას დაემატოს 14 ჰა ტერიტორია.  

მისივე განცხადებით, ფერმის გაფართოება კომპანიას  წელიწადში 400 ტონამდე ლოკოკინას წარმოების შესაძლელობას მისცემს. ამ დროისთვის „სნეილ ქეჩი“ ჯამში 120 ტონა ლოკოკინას აწარმოებს.

როგორც ნადარაია აცხადებს, ნოემბერში სენაკსა და ხობში წარმოებული ლოკოკინები ექსპორტზე იტალიის შემდეგ ესპანეთშიც გავა.

მოლაპარაკებები აღნიშნულ ქვეყანასთან წარმატებით დასრულდა, შედეგად, საწყის ეტაპზე ესპანეთში სატესტოდ, 20 ტონა ლოკოკინა გაიგზავნება.

2020 წლის შემოდგომიდან კომპანიამ ცოცხალი ლოკოკინის ექსპორტი იტალიაში დაიწყო.

ნადარია აცხადებს, რომ ჯამში „სნეილ ქეჩი“ საერთაშორისო ბაზარს წლიურად დაახლოებით 800 ტონა ლოკოკინას მიაწვდის, აქედან 120 ტონა საკუთარი ფერმიდან იქნება, დანარჩენი კი საქართველოს მასშტაბით, სხვადასხვა ფერმეებთან თანამშრომლობის შედეგად.

როგორც ცნობილია, „სნეილ ქეჩი“ სენაკში ლოკოკინების ნახევარფაბრიკატების ქარხნის მშენებლობაში 2 მლნ ევროს ინვესტიციას ახორციელებს. ქარხანა 1 800 კვადრატულ მეტრ ფართობზე აშენდა. პროექტი ითვალისწინებს ლოკოკინის ხორცის გადამუშავებას, რომელსაც კომპანია ასევე ნოემბრიდან დაიწყებს. 

კომპანიის საკუთრებაშია  ხობში 6 ჰექატრზე,ხოლო სენაკში 3 ჰა-ზე გაშენებული ლოკოკინას ფერმა.ევროპის ბაზარზე ამ დროისთვის 1 კგ ლოკოკინის ფასი 4.5  ევროა.

„ერთიანი აგროპროექტის“ ფარგლებში სამეგრელოს რეგიონში, ხობის მუნიციპალიტეტის სოფელ ახალ ხიბულაში თანამედროვე სტანდარტებით აღჭურვილი ლოკოკინების ფერმა „ნადი გრუპი“ გასულ წელს შეიქმნა. ბენეფიციარმა შეღავათიანი აგროკრედიტით 1,26 მლნ ლარი მიიღო.