შვეიცარიულ-ქართული ტექნოლოგიით დამზადებული ყველი აშშ-ში იყიდება

დმანისში შვეიცარიულ-ქართული ტექნოლოგიით წარმოებული ყველი აშშ-ში აქტიურად იყიდება. 5 სახეობის შვეიცარული რეცეპტით დამზადებული ყველის პირველი პარტია აშშ-ში მარტში გავიდა, მეორე - დაახლოებით 1 თვის წინ.

პროექტს ახორციელებს შვეიცარიული აგრარული სკოლა “კავკასია“, რომლის დამფუძნებელი სოფლის მეურნეობის ყოფილი მინისტრი და "მარგებელი ჰოლდინგის" მფლობელი მიხო სვიმონიშვილია. პროექტს ბიზნესმენი შვეიცარიელ პარტნიორებთან ერთად ახორციელებს.

როგორც „ბიზნესპარტნიორს“ სკოლის დირექტორმა თინათინ მახარაძემ განუცხადა, ჯამში აშშ-ში 1 ტონა ყველის ექსპორტი განხორციელდა და  პროდუქტი აშშ-ის  მარკეტებში უკვე იყიდება. 

„ამ ბაზართან თანამშრომლობას ვაგრძელებთ, სტაბილური ბაზარია. საკმაოდ დიდი მოწონებაც დაიმსახურა.  ექსპორტის კუთხით ვმუშაობთ სხვა ქვეყნების ბაზრებთანაც, თუმცა, ამ დროისთვის რაიმე კონკრეტულის თქმა რთულია,“-აცხადებს მახარაძე.

მისივე განცხადებით, დმანისში წარმობული ყველი ადგილობრივ ბაზარზეც, კერძოდ, “ბლაუენშტაინ საქართველოს“ მაღაზიათა ქსელში იყიდება.

„ბლაუენშტაინ საქართველოს“ ქსელში 100 გრამი მთის დავარგებული ყველის, მუჩლის, რაკლეტის და კამამბერის ფასი 12 ლარია, 100 გრამი კრემყველის ღირებულება კი 6 ლარი. მახარაძის განცხადებით, ყველი „კავკასიის“ ბრენდით იყიდება.

შეგახსენებთ, დმანისის მუნიციპალიტეტში, სოფელ სარკინეთში  შვეიცარიული პროფესიული განათლების მოდელის მიხედვით სკოლა და საცხოვრებელი კამპუსი ფუნქციონირებს.