საწვავი გაძვირდა - ნავთობიმპორტიორთა კავშირი მცოცავი აქციზის შემოღების ინიციატივით გამოდის

საწვავი ისევ გაძვირდა - არაბრენდირებულ ბენზინგასამართ სადგურებზე საშუალოდ 10, ბრენდირებულ ბენზინგასამართ სადგურებზე კი 7 თეთრით.

ფასის მატების პარალელურად ნავთობპროდუქტების იმპორტიორთა კავშირი ინიციატივით გამოდის. გაერთიანებაში ფიქრობენ, რომ ვითარების დასტაბილურება ეგრეთწოდებული მცოცავი აქციზის გადასახადის შემოღებით არის შესაძლებელი.

„სამწუხაროდ ფასები კიდევ გაიზარდა და არც სამომავლო პროგნოზებია მაინცდამაინც პოზიტიური. ყველაზე კარგი სცენარითაც კი ფასების კლება არ განიხილება და კარგი იქნება თუ არსებული ნიშნული მაინც შენარჩუნდა სტაბილურად. მართალია ლარი გამყარდა, მაგრამ საერთაშორისო ბაზარზე გაზრდილი ფასის პირობებში მხოლოდ კურსი დამაკომპენსირებელი ვერ იქნება. ლარი რომ არ გამყარებულიყო კიდევ უფრო მეტად გაძვირდებოდა საწვავი. ერთადერთი გამოსავალი სიტუაციიდან სახელმწიფო სტრუქტურების გააქტიურებაა. ჩემი აზრით, კარგი იქნება თუ სხვა ქვეყნებში არსებულ პრაქტიკას გადმოვიღებთ და დავაწესებთ ეგრეთწოდებულ მცოცავი აქციზის გადასახადს. უნდა განვსაზღვროთ ღირებულების მაქსიმალური წერტილი, რომლის შემდეგაც აქციზი შემცირდება დროებით ვითარების დასტაბილურებისთანავე კი ისევ საჭირო ნიშნულს დაუბრუნდება. როცა პლაცის ფასი კრიტიკულად მაღალი იქნება მაშინ ამოქმედდეს შეღავათის ბერკეტი. გაძვირების გარდა ეს გამოიწვევს იმას რომ აღარ მოხდება საწვავის ფასების ზრდით ინფლაციის პროცესის წახალისება,“ - განმარტავს ვანო მთვრალაშვილი.

დღეის მდგომარეობით ბრენდირებულ ბენზინგასამართ სადგურებზე 1 ლიტრი რეგულარის ტიპის ბენზინის ღირებულება 2,89-დან 2,95 ლარამდე მერყეობს. რაც შეეხება დიზელს, მისი ფასი 2,78-3 ლარის ფარგლებშია.