სასმელი "კაი" სექტემბრიდან ბელორუსის, წლის ბოლოდან კი რუსეთის ბაზარზე გაიყიდება

პირველი ქართული ბოტანიკური სასმელი „კაი“  საექსპორტო ბაზრებს აფართოებს.  

როგორც კომპანიის დირექტორი გიორგი ჯირკვალიძე „ბიზნესპარტნიორთან“ აცხადებს, მიუხედავად იმისა, რომ კომპანიას აქცენტი ევროპის ბაზარზე აქვს, სექტემბერში  პროდუქცია ბელორუსში გავა, წლის ბოლოსთვის კი - რუსეთში.

„ის რომ პროდუქცია რუსეთში არ გავიტანოთ, ჩვენ უფრო დაგვაზარალებს, ვიდრე რუსეთს. ასეთი მიდგომა გვაქვს,“-აცხადებს ჯირკვალიძე.

ამ დროისთვის ბოტანიკური სასმელი ექსპორტზე პოლონეთსა და დიდ ბრიტანეთში გადის. მიმდინარეობს მოლაპარაკებები ესპანეთთან.

გამაგრილებელი სასმელი ქართველი  მეცნიერების მიერ შემუშავებული ფორმულით შეიქმნა და ალპური კავკასიონის 16 მცენარისგან არის დამზადებული. გაზირებული-გამაგრილებელი სასმელის წარმოება პანდემიის პერიოდში, 2020 წლის სექტემბრიდან დაიწყო.

კომპანიის ხელმძღვანელი ადგილობრივ ბაზარზე გაყიდვებით კმაყოფილია.

პროექტის საინვესტიციო  ღირებულება დაახლოებით 10 მლნ დოლარია. საწყის ეტაპზე კომპანია 50 ადამიანს ასაქმებს. „შეცვალე ქიმია ბოტანიკით“ ბრენდის მთავარი დევიზია და ეტაპობრივად ბაზარს ახალ პროდუქტებს შესთავაზებს. ამჟამად „კაის“ პროდუქცია საქართველოს მასშტაბით, დიდ ქსელურ მარკეტებში იყიდება.