სამკაულების ბრენდი TIONE ხელნაკეთი ჩანთების ხაზს გამოუშვებს

ქართული ბრენდი TIONE ხელნაკეთი ჩანთების ხაზს გამოუშვებს, მომავალში კი ტანსაცმლის ხაზის შექმნასაც აპირებს. კომპანია მომხმარებლებს ბუნებრივი ქვებით დამზადებულ ხელნაკეთ სამკაულებს უკვე რამდენიმე წელია ქმნის. TIONE–ს დამფუძნებელი „ბიზნესპარტნიორთან“ ამბობს, რომ კომპანიას თავისი გამორჩეული ნიშა აქვს.

„გადავწყვიტე შემექმნა ვეგანური და ნატურალური ტყავის ჩანთები, რომლის დიზაინშიც გამოვიყენებ სხვადასხვა მეტალს, ქვებს, შესაბამისად TIONE–ს ნიშას სრულიად შევინარჩუნებ, რადგან ბრენდის პოპულარობა თავის დროზე სწორედ აქსესუარების ორიგინალურობამ და გამორჩეულმა დიზაინმა განაპირობა. მაქვს პატარა სახელოსნო, სადაც ჩემი ხელით ვქმნი ყველაფერს. ნედლეული ძირითადად ადგილობრივია.

ერთ-ერთი სიახლე იქნება ჩემი ნახატები, რომელსაც გამოვიყენებ ჩანთების კოლექციაში, ასევე სამომავლოდ არ გამოვრიცხავ ტანსაცმლის ხაზის შექმნას. პანდემიის გამო, ტურისტულ ზონებში არსებულ მაღაზიებში აქსესუარების გაყიდვა შევამცირეთ და ორიენტირებული ვართ ონლაინ გაყიდვებზე. გვინდა საერთაშორისო პლატფორმებზეც განავთავსოთ TIONE-ს აქსესუარები, რადგან მოთხოვნა საკმაოდ დიდია,“ – აღნიშნავს, თიო ლომიძე.

TIONE–ს სამკაულების შეძენა მომხმარებლებს facebook გვერდით შეუძლიათ. ამ ეტაპზე გაყიდვაშია ყელსაბამები, საყურეები, სამაჯურები და ა.შ. აქსესუარების ფასი დამოკიდებულია დიზაინის სირთულეზე და დამკვეთის მოთხოვნებზე.

„როდესაც ყველაფერი ჩვეულ რიტმს დაუბრუნდება, ბრენდი ბევრი კარგი სიახლით, ახალი მიმართულებებით შეხვდება მომხმარებელს,“ – ამბობს ბრენდის დამფუძნებლი. 

მეწარმეთა პოპულარიზაცია ხორციელდება "ბიზნესპარტნიორის" მიერ მეწარმეთა ასოციაციასთან თანამშრომლობით.