საკონტეინერო გადაზიდვები გაძვირდა

კონტეინერების გადაზიდვის ღირებულება საშუალოდ 50%-ით გაძვირდა. როგორც სექტორის წარმომადგენლები ამბობენ, ტენდენცია ჯერ კიდევ გასული წლის ბოლოდან დაიწყო.

„კოსკო შიფინგ ლაინის“ ფინანსური დირექტორის განმარტებით, მიზეზი ჩინეთის ექსპორტის რეკორდული ზრდაა, რის გამოც მთელ მსოფლიოში კონტეინერების დეფიციტი შეიქმნა.

„თუ სამი თვის წინ ერთი კონტეინერის გადაზიდვა ჩინეთიდან ფოთის მიმართულებით 3 000 დოლარი ღირდა, დღეს ფასი უკვე 10 000 დოლარამდეა გაზრდილი. ჩინეთმა 2020 წელს ისტორიული, რეკორდული ექსპორტი განახორციელა. რამაც გამოიწვია ის, რომ გემები გადაიტვირთა, ადგილები უბრალოდ აღარ იყო. ტარიფის ზრდის მიზეზი სწორედ ეს ფაქტორი გახდა. ეს ელემენტარულია, როცა გემზე ადგილი არ არის, ფასი იზრდება,“ - აღნიშნა გივი ჩაჩანიძემ.

მისივე განმარტებით, კონტეინერების გადაზიდვის ღირებულება სავარაუდოდ კლებას თებერვლის ბოლოდან დაიწყებს.

„ჩინური ახალი წლის დადგომის შემდეგ, ადგილობრივები სამუშაო ადგილებიდან საკუთარ სახლებში მიემგზავრებიან. რა დროსაც ჩინეთში ქარხნებში წარმოება მცირდება, შესაბამისად მცირდება ჩინეთიდან ექსპორტიც. ეს ავტომატურად გაათავისუფლებს გემებს, კონტეინერებს და ჩვენ გვექნება ფასების დაბლა სვლის ტენდენცია," - აღნიშნა გივი ჩაჩანძემ.