რუსთავის აზოტის თანამშრომლები ვაქცინაციას წინასწარი რეგისტრაციის გარეშე შეძლებენ
რუსთავის „აზოტი" იმ საწარმოთა რიცხვშია, რომელთა თანამშრომლები ორგანიზებულად, წინასწარი რეგისტრაციის გარეშე, შეძლებენ კოვიდ-ის საწინააღმდეგო ვაქცინით აცრას.
პროცესს ორგანიზებას უწევს ეკონომიკისა და მდგრადი განვითარების სამინისტრო, ჯანდაცვის სამინისტროსთან კოორდინირებით.
ვაქცინაციის პირველ დღეს „აზოტის" 100-მდე თანამშრომელი აიცრა.
ეკონომიკის სამინისტროს ცნობით, რუსთავში მდებარე საწარმოების თანამშრომელთა ვაქცინაცია კლინიკა „რუსთავში" მიმდინარეობს.
რუსთავის „აზოტი" ქვემო ქართლში მდებარე მეორე საწარმოა „ქართლი ტექსტილის" შემდეგ, რომელთა თანამშრომლებიც მასობრივი ვაქცინაციის პროცესში მონაწილეობენ.
ეკონომიკის სამინისტრო აცხადებს, რომ უახლოეს პერიოდში ვაქცინაცია ჩატარდება არა მხოლოდ რუსთავში, არამედ საქართველოს სხვა რეგიონებში, სადაც კერძო სექტორში დასაქმებულები ორგანიზებულად შეძლებენ აცრას.
