Rosali Sambar: მთლიან გაყიდვებში კორპორატიული სეგმენტი ლიდერობს

შოკოლადის მწარმოებელ კომპანია Rosali Sambar-ში გაყიდვების გააქტიურებაზე საუბრობენ.

როგორც „ბიზნესპარტნიორს“ კომპანიის წარმომადგენელმა პაპუნა ძაძამიძემ განუცხადა, კომპანია  შოკოლადს მაღალი საფასო სეგმენტისთვის აწარმოებს და მისი დამკვეთები ძირითადად დიდი კომპანიები არიან.

მისი განცხადებით, მთლიან გაყიდვებში კორპორატიულ სეგმენტს უფრო მეტი წილი უჭირავს, ვიდრე საცალოს.როგორც ძაძამიძე აღნიშნავს, დიდი როლი ითამაშა ტურიზის სექტორის გააქტიურებამაც, რადგან კომპანიის ერთ-ერთი ძირითადი დამკვეთი სასტუმროებია.

„პანდემიამდელ გაყიდვებს ჯერ ვერ მიაუხლოვდით, თუმცა, ვიმედოვნებთ, რომ ამას წლის ბოლომდე მოვახერხებთ. გააჩნია, როგორი ტენდენცია იქნება ქვეყანაში,“-აცხადებს ძაძამიძე.  

კომპანიას ნედლეული ბელგიიდან შემოაქვს. დღევანდელი მდგომარეობით, კომპანია 5-7 სახეობის შოკოლადს აწარმოებს, მათ შორის საბავშვო.

გარდა ამისა, რძიანი, შავი, დიაბეტური, თეთრი და თხილიანი შოკოლადი. როგორც ძაძამიძე აღნიშნავს,  Rosali Sambar-ის წარმადობა თვეში 1 ტონაა.  

კომპანიამ ბაზარზე ოპერირება 15 წლის წინ დაიწყო. საწარმოსთან ერთად, კომპანიას ერთი მაღაზია აქვს.