“როიალ ბატონი“: ყოველთვიურად ზარალი დაახლოებით 15–20 ათასი ლარია

სასტუმრო “როიალ ბატონის“ გენერალური მენეჯერის ლაშა ხეთერელის განცხადებით, ყოველთვიურად ზარალი დაახლოებით 15–20 ათას ლარს შეადგენს. 

„თვეში 25%–იანი დატვირთვით ვმუშაობთ. გვქონდა მოლოდინი, რომ ზამთრის კურორტების დაკეტვა ჩვენს მომხმარებელს გაზრდიდა, თუმცა, ჩვენს სასტუმროზე ამ გადაწყვეტილებას დადებითდ არ უმოქმედია. როგორც ჩანს, ხალხი შეშინებულია და ერიდება გადაადგილებას. დაახლოებით ერთი წელია ვცდილობთ, რომ ყველა თანამშრომელი შევინარჩუნოთ და გადავუხადოთ ხელფასი.

შიდა ტურიზმის განვითარება კარგია, მაგრამ ბევრი დამაბრკოლებელი ფაქტორია სანამ სტუმარი ჩვენამდე მოვა. საფასო პოლიტიკის შეცვლაც მოგვიწია, ამ ეტაპზე 2 კაციანი ნომრის ღირებულება საუზმით და დღგ–ს ჩათვლით 100–120 ლარია, როდესაც 400 ლარზე მეტი ღირდა. ჩვენ ვაკვირდებით მოვლენების განვითარებას ქვეყანაში და მსოფლიოში,თუ იანვრის თვისთვის ეპიდემიოლოგიური სიტუაცია არ გამოსწორდა, შესაძლოა განვიხილოთ ფუნქციონირების დროებით შეწყვეტა.“– აღნიშნავს ლაშა ხეთერელი.

„როიალ ბატონი“ თბილისიდან 146 კილომეტრში, კახეთში მდებარეობს. ამ ეტაპზე სასტუმროში 30 ნომერი, ღია აუზი და სხვა სივრცეებია მოწყობილი. ხეთერელის თქმით სასტუმროს გაფართოებასთან დაკავშირებული გეგმები აქვს და მიმდინარეობს ამ საკითხზე მუშაობა.