რატომ ვერ მოიზიდა "ალგორითმმა" $1.2 მლნ-ის ინვესტიცია

კომპიუტერების მწარმოებელი კომპანია „ალგორითმმა” წარმოების გასაახლებლად ინვესტიციები ვერ მოიზიდა.

როგორც „ბიზნესპარტნიორს“ კომპანიის მენეჯერმა დავით კორახაშვილმა განუცხადა, ქართულ IT კომპანიაში ინვესტიციების განხორციელებით რამდენიმე ქართველი ბიზნესმენი იყო დაინტერესებული, თუმცა, საბოლოოდ, შეთანხმება  ვერ შედგა.

კომპანიამ წარმოების გასაახლებლად საჭირო თანხები ვერც კომერციული ბანკებისგან მოიზიდა.

„ინვესტირებაზე უარის თქმის მიზეზი სხვადასხვა იყო, ზოგისთის მაღალი პროცენტი, ზოგისთვის ფასი. საუბარი იყო 1.2 მლნ დოლარზე. ყველაზე მეტად ამ ქარხნის დახურვით ქვეყანამ იზარალა. სამწუხაროა, რომ ამ წლების განმავლობაში არ ყოფილა სახელმწიფოს მხრიდან არანაირი ხელშეწყობა. მიუხედავად ამისა, კომპანიამ ბოლო 3 წელში შეძლო და 6 ამერიკული, 3 ჰოლანდიური და 3 გერმანული, მსოფლიოში საუკეთესო ბრენდის ოფიციალური იმპორტიორი გახდა,“ - აცხადებს კოროხაშვილი.

შეგახსენებთ, „ალგორითმის“ ქარხანა 2011 წელს გაიხსნა. ქარხანაში პირველკალსელების კომპიუტერების აწყობა და პროგრამების ჩატვირთვა ხორციელდებოდა. სწორედ, ამ ქარხანაში აწყობილი ნეთბუქები მიიღეს 2011-2012-2013 წლებში პირველკლასელებმა.

ქარხანა „ალგორითმმა“ ბოლო მსხვილი შეკვეთა სახელმწიფოს მხრიდან პირველკლასელთა ნეთბუქებზე 2013 წელს მიიღო, მას შემდეგ კი ქარხანა გაჩერებულია.