"ყველაზე კარგი იქნება, საწვავი იაფი იყოს" - "ვისოლ ჯგუფის" პრეზიდენტი
„ჩვენ მილიონჯერ გვითქვამს და კიდევ ვიტყვით, რომ ყველაზე კარგი იქნება, საწვავი იყოს იაფი.“ - ასე გამოეხმაურა საწვავის ფასის ბოლოდროინდელ მატებას „ვისოლ ჯგუფის“ პრეზიდენტი.
როგორც სოსო ფხაკაძემ „ბიზნესპარტნიორს“ განუცხადა, საქართველოში საწვავის ფასებზე ნეგატიურად ორი ძირითადი ფაქტორი მოქმედებს. მათ შორის, ლარის კურსის გაუფასურება და საერთაშორისო ბაზარზე ნავთობის გაძვირება.
„დღეს ხელმისაწვდომია ნებისმიერი ინფორმაცია, რა ხდება საერთაშორისო ბაზარზე და სამწუხაროა, რომ ნავთობის ფასები ზემოთ მიდის. მეორე კომპონენტია ლარის კურსი. ორივე მნიშვნელოვანი კომპონენტი არასახარბიელოდ ვითარდება და შესაბამისად, აისახება საწვავის ფასზე. ჩვენ მილიონჯერ გვითქვამს და კიდევ ვიტყვით, რომ ყველაზე კარგი იქნება, საწვავი იყოს იაფი. ეს ნიშნავს იმას, რომ მოთხოვნა საბრუნავ სახსრებზე დაბალია და უფრო მეტი მოთხოვნა არსებობს მომხმარებლების მხრიდან პროდუქტის შეძენაზე.
საქართველო, როგორც ძალიან ბევრი ქვეყანა არის ნავთობპროდუქტების მომხმარებელი. შესაბამისად, იმედი უნდა გვქონდეს, რომ ორივე მიმართულებით თუ რაღაც დადებითი სიგნალები იქნება, შესაბამისი კორექტირება მოხდება. ფაქტია რომ დაბალი ფასის შემთხვევაში მოთხოვნა ნავთობპროდუქტებზე მეტი იქნებოდა, მითუმეტეს იმ ფონზე, როცა სეზონი იწყება.“-განაცხადა სოსო ფხაკაძემ.
