“პროდუქციის გაძვირება გაყიდვების მაჩვენებელზეც აისახება“ - “ჩემი რანჩო“

ბოცვრის ხორცის მწარმოებელი ადგილობრივი კომპანია „ჩემი რანჩოს“ ხელმძღვანელი  ვანო იოსელიანი მთავრობის გადაწწყვეტილებას გაზის ტარიფის მომატებასთან დაკავშირებით უარყოფითად აფასებს.

„ბუნებრივი გაზის ტარიფის ზრდა პირდაპირ თუ ირიბად იმოქმედებს პროდუქციის თვითღირებულებაზე,რადგან ელექტროენერგია და ბუნებრივი გაზი წარმოების ნაწილია. არის მეორე მომენტი, არსებული რეალობა, როდესაც ლარი უფასურდება და გვიძვირდება ნედლეული: ხორბალი, ქერი და ა.შ. მიუხედავად იმისა, რომ გარკვეული კომპონენტები გაძვირდა, თავი შევიკავეთ ფასის მომატებისგან. თუ პროდუქციის ფასის გაზრდა მოგვიწევს, ეს რა თქმა უნდა იმოქმედებს გაყიდვებზე. უნდა აღინიშნოს, რომ აქამდე გაყიდვების კლება არ მომხდარა.“– აღნიშნავს ვანო იოსელიანი.

შეგახსენებთ,გარდაბანში, სოფელ გამარჯვებაში  არსებული  კომპლექსი მოიცავს როგორც  ფერმას, გადამამუშავებელ საწარმოს, ისე ლაბორატორიებს და სასაკლაოს.

რაც შეეხება გაზის ტარიფის ცვლილებას,2021 წლის 3 იანვრიდან კომპანიის არასაყოფაცხოვრებო მომხმარებლისათვის მისაწოდებელი ბუნებრივი გაზის ფასი ერთ კუბურ მეტრზე განისაზღვრება 1.10 (ერთი ლარი და 10 თეთრი) ლარით, დამატებული ღირებულების გადასახადის ჩათვლით.

ბუნებრივი გაზის ფასი არ ძვირდება საყოფაცხოვრებო მომხმარებლებისთვის, რომელიც 1 კუბურ მეტრზე  0,461374 ლარს შეადგენს და დადგენილია სემეკის მიერ. ასევე, ქვეყანაში დღეს არსებული მდგომარეობის გათვალისწინებით ტარიფი არ გაუძვირდებათ პურის საწარმოებს.