პრეზენტაციების ონლაინ გამართვა და ნაკლები რისკი - “თელავის ღვინის მარანის“ გეგმები
ღვინის მწარმოებელი კომპანია „თელავის ღვინის მარანის“ სამეთვალყურეო საბჭოს თავმჯდომარე „ბიზნესპარტნიორთან“ 2021 წლის სამოქმედო გეგმაზე საუბრობს და აცხადებს, რომ იმისთვის, რომ ბიზნესმა პანდემიის შედეგად მიყენებულ ნეგატიური პროცესები მეტ-ნაკლებად უმტკივნეულოდ გადალახოს, ორ მიმართულებაზე უნდა გაამახვილოს ყურადღება.
პირველი, როგორც რამაზაშვილი აცხადებს, ბაზრის მიმართ დიდი სიფრთხილის გამოჩენაა საჭირო - მსოფლიოში ვერავინ გათვალა პანდემიის მოსვლა და ბუნებრივია, რომ ვერც წასვლას გათვლის. სწორედ ამიტომ, 2021 წელს არ ღირს ზედმეტი რისკის გაწევა.
„ბიზნესი არის ბიზნესმენის რისკი და როდესაც ის ბიზნესს იწყებს, უნდა იფიქროს, რომ ეს შეიძლება იყოს მომგებიანი და შეიძლება - არა. რისკების მართვა ყველაზე მნიშვნელოვანია, შესაბამისად, როდესაც ბიზნესში შედიხარ, ამის ხიფათი ყოველთვის არსებობს. არ შეიძლება ყოველთვის იყოს ლაჟვარდოვანი ცა და ნათელი მომავალი. ჩვენ ცოტა არ იყოს შეცდომაში შეგვიყვანა იმ ფაქტმა, რომ გასული წლები იყო ზრდადი და ზოგიერთი კომპანია, განსაკუთრებით, მცირე კომპანია მოეშვა ამ თვალსაზრისით. მათ ვერ გათვალეს რისკები, რამაც მცირე საწარმოებში ასეთი დიდი პრობლემები გამოიწვია. ყველაფრიდან გამომდინარე, არ უნდა ველოდოთ უკეთესს, უნდა ვიფიქროთ იმაზე, რომ შეიძლება უარესიც მოხდეს. ოპტიმისტები არ უნდა ვიყოთ, ყველაფერი ძალიან პრაგმატულად უნდა გავთვალოთ და არ უნდა ჩავთვალოთ, რომ ამ პანდემიას უკუსვლა უნდა ჰქონდეს,“ - აცხადებს რამაზაშვილი.
მისივე თქმით, მეორე სტრატეგია, რომელიც მომავალ წელს ბიზნესმა უნდა გაითვალისწინოს - პანდემიის შედეგების შესწავლაა. მათ შორის, შესწავლილ უნდა იქნას მომხმარებელთა ქცევა, მათი მოთხოვნა, დისტრიბუციის გზები, რომელიც ასევე შეიცვალა და ხშირ შემთხვევაში ის ონლაინ ფორმატში გადავიდა, ფართოდ გავრცელდა ონლაინ დეგუსტაციებიც.
„შესაბამისად, ჩვენ მოგვწიევს ახალ რელსებზე გადასვლა. უნდა ვისწავლოთ პრეზენტაციების ონლაინ ჩატარება. მათ შორის, სახელწმიფოს მხრიდან ქართული ღვინის პრომოუშენი ონლაინაც შეიძლება, სხვა გზა არ არის,“ - აცხადებს რამაზაშვილი.
