ოკტოპუსი: მიმდინარე წელს 2020-2021 წლებში დაგროვილ ვალდებულებებს ვემსახურებით

„ოკტოპუს ფიტნეს კლუბის“ დირექტორი გიორგი ასათიანი „ბიზნესპარტნიორთან“  აცხადებს, რომ პანდემიური 2 წლის შემდეგ კომპანიის ფინანსური მდგომარეობა შედარებით გამოსწორებულია. 

მისი ინფორმაციით, კომპანიის შემოსავლებმა გადაუსწრო პანდემიამდელ მაჩვენებლებს, თუმცა, ეს არ ნიშნავს იმას, რომ "ოკტოპუს გიტნეს კლუბი" მოგებაზე გადის.

„პანდემიის გამო ბიზნესის დაკეტვამ საკმაოდ დიდი ზარალი მოგვიტანა. თუმცა, ახლა აქტივობა გაზრდილია. გარდა ამისა, ახალი ტენდენციაც თვალსაჩინოა, თუ ხალხი პანდემიამდე 1-2 თვიან აბონიმენტებს ანიჭებდა უპირატესობას, ახლა 1 წლიანით სარგებლობა ურჩევნიათ,“-აცხადებს ასათიანი.

მისივე განცხადებით, კომპანიას გაზრდილი ინფლაციის პირობებში ფასების ზრდა მოუწია.  როგორც ასათიანი აცხადებს, შექმნილი სიტუაცია ამ ეტაპზე არ იძლევა იმის შესაძლებლობას,რომ რეინვესტიცია გაკეთდეს.

ფიტნეს კლუბი „ოკტოპუსი“  2016 წლის ზაფხულში გაიხსნა. „ოკტოპუსი“ აღჭურვილია უმაღლესი ხარისხის Lifefitness-ის და Tecnogym-ის ტრენაჟორებით.