ნინა კობახიძე: იმის ნაცვლად ეკონომიკის განვითარებაზე ვმუშაობდეთ, გაურკვეველ ჩიხში შევდივართ
„იმ ფონზე, როცა ქვეყანაში ეკონომიკა ასეთ მდგომარეობაშია, ვაქცინა ჯერ არ შემოსულა და პანდემიაა, ასეთი გადაწყვეტილება მართლა ძალიან არასწრია,“ - ასე გამოეხმაურა „ქართულ ჰოსპიტალთა ჯგუფის“ სამეთვალყურეო საბჭოს თავმჯდომარე პრემიერის თანამდებობიდან წასვლის გადაწყვეტილებას.
ნინა კობახიძის განმარტებით, ამ ტიპის გადაწყვეტილებებით ზიანდება ქვეყნის ეკონომიკა და ქვეყანა კიდევ ერთხელ გაურკვეველ ჩიხში შედის.
„იმედია, დროზე მოგვარდება ეს გაურკვევლობა, ისევ პრაქტიკულად პოლიტიკურ კრიზისამდე მივედით. მთელი ჩვენი ცხოვრება ასე ვართ, მთავარზე აქცენტირება არ კეთდება. ამ ფონზე კი ძალიან მალე გვერდით ჩაგვივლიან ძლიერი ქვეყნები. იმის მაგივრად ეკონომიკის განვითარებაზე ვმუშაობდეთ, გაურკვეველ ჩიხში შედის ქვეყანა და უკვე მერამდენედ. ეს მხოლოდ პრობლემას უქმნის ისედაც ძალიან უკან დახეულ ეკონომიკას," - განაცხადა ნინა კობახიძემ.
„ჯეო ჰოსპიტალის“ სამეთვალყურეო საბჭოს თავმჯდომარემ ამ ეტაპზე გახარიას პრემიერობის შეფასებისგან თავი შეიკავა და აღნიშნა, რომ სწორედ ახლა იყო პერიოდი, როცა გიორგი გახარიას საკუთარი შესაძლებლობები გამოევლინა.
„გიორგი გახარიას შეფასებებისგან თავს შევიკავებ ამ ეტაპზე. მას ახლა უნდა გამოევლინა თავი, მას შეეძლო რაღაც სხვა ტიპის გადაწყვეტილება მიღო. ძალიან დიდი იმედი მაქვს, რომ ოცნება ძალიან სწრაფად წარმოადგენს ახალ კანდიდატურას და ამაზე მაინც არ შეიქმნება პრობლემა,“ - განმარტა ნინა კობახიძემ.
მისივე თქმით, ახალ პრემიერს ექნება ორი ძირითადი გამოწვევა. ერთი, რაც შეიძლება სწრაფად უზრუნველყოს ქვეყანა ვაქცინით, დაასრულოს კოვიდ პანდემია და მეორე აღადგინოს ეკონომიკა და დააბრუნოს პანდემიამდელ ვითარებაში.
