მთავრობა საწვავის გაიაფების მოლოდინშია
მთავრობა საწვავის გაიაფებას ელის.
როგორც ეკონომიკის მინისტრმა ლევან დავითაშვილმა საწვავის რეალიზატორი მსხვილი ქსელების წარმომადგენლებთან შეხვედრის შემდეგ განაცხადა, მთავრობას მოლოდინი აქვს, რომ მიმდინარე თვის ბოლოსთვის გასამართ სადგურებზე საწვავის ფასები საგრძნობლად შემცირდება.
ეკონომიკის სამინისტროში გამართულ შეხვედრაზე, რომელსაც ფინანსთა მინისტრი ლაშა ხუციშვილიც ესწრებოდა, საწვავის ბაზარზე არსებული პროგნოზები, კონკურენციის საკითხები და მარჟების მინიმუმამდე შემცირების შესაძლებლობები განიხილეს.
ლევან დავითაშვილის ინფორმაციით, კერძო სექტორთან ერთად განიხილება საწვავის ბაზარზე კონკურენციის, ასევე საწვავით მომარაგების იაფი წყაროების მოძიების საკითხები, რამაც შესაძლებელია უზრუნველყოს ავტოგასამართ სადგურებზე საწვავის არსებული ფასების შემცირება. მისივე განცხადებით, მთავრობა, კერძო სექტორთან ერთად, აქტიურად მუშაობს და განიხილავს მაქსიმალურ შესაძლებლობებს ფასების შემცირებასთან დაკავშირებით.
შეხვედრაზე კონკურენციის სააგენტოს ხელმძღვანელმა ირაკლი ლექვინაძემ ნავთობპროდუქტების ბაზრის მონიტორინგის შედეგები წარადგინა.
