"მივესალმები თუ ბიზნესომბუდსმენის შერჩევისას გენდერული ბალანსი იქნება გათვალისწინებული"
„ის ადამიანი, რომელიც ბიზნესომბუდსმენად შეირჩევა ბიზნესთან კარგი კომუნიკაციის უნარით უნდა გამოირჩეოდეს“ - ამის შესახებ „ბიზნესპარტნიორს“ „ნატახტარის“ მწარმოებელი „ეფ-ეს-საქართველოს“ კორპორაციულ საქმეთა დირექტორმა განუცხადა.
ნიკოლოზ ხუნძაკიშვილის თქმით, დასახელებულ კანდიდატს ბიზნესის პრობლემები ძალიან კარგად უნდა ესმოდეს.
„აუცილებელია, რომ შეირჩეს სწორედ ისეთი კანდიდატი, რომელსაც ბიზნეს საზოგადოება პატივს სცემს, იცნობს, რომელმაც იცის ჩვენი პრობლემები და ასევე, თუ შერჩევის პროცესში გენდერული ბალანსის დაცვაც იქნება გათვალისწინებული, მივესალმები,“ - განაცხადა ნიკოლოზ ხუნძაკიშვილმა.
მისივე თქმით, კონსულტაციების გზით ახალი კანდიდატის შერჩევა კერძო-საჯარო ურთიერთობებში წინ გადადგმული ნაბიჯია.
„თუ ბიზნესი წარვადგენთ და სწორედ ერთმანეთთან კონსულტაციების გზით შევარჩევთ ახალ კანდიდატს იქნება ძალიან კარგი პრაქტიკა. კერძო-საჯარო ურთიერთობაში კი წინ გადადგმული მნიშვნელოვანი ნაბიჯი. შეიძლება კანდიდატი იყოს ბიზნესიდან ან ბიზნესთან დაკავშირებული ორგანიზაციებიდან, ამ ადამიანთა წრე არის ძალიან ფართო,“ - განაცხადა „ნატახტარის“ მწარმოებელი „ეფ-ეს-საქართველოს“ კორპორაციულ საქმეთა დირექტორმა.
შეგახსენებთ, რომ მთავრობა ახალ ბიზნესომბუდსმენს ეძებს. „ბიზნესპარტნიორის“ ინფორმაციით, მსხვილ ბიზნესთან გამართულ შეხვედრაზე პრემიერმა კერძო სექტორს შესაფერისი კანდიდატურის დასახელება სთხოვა.
