მესხური მინი სოფლის მოწყობა და "ქვევრის ლუდის" საფირმო მაღაზიის გახსნა გადაიდო

ქვევრის ლუდის მწარმოებელმა კომპანიამ „ვარძია“, ასპინძაში, მესხური მინი სოფლის მოწყობა და თბილისში “ქვევრის ლუდის“ საფირმო მაღაზიის გახსნა დროებით გადადო.

როგორც „ბიზნესპარტნიორს“ კომპანის დამფუძნებელმა ზაზა ზედგენიძემ განუცხადა, მიზეზი  ტურისტების სიმცირეა. ბიზნესმენი აღნიშნული პროექტების განხორციელებას მას შემდეგ გეგმავს, რაც  სიტუაცია სტაბილიაციისკენ წავა (იგულისხმება პოსტპანდემიური პერიოდი და რუსეთ-უკრაინის ომი).

„ტურისტული ბიზნესი ძალიან სენსიტიურია, თუ არ გაუმჯობესდა სიტუაცია არ ღირს. მითუმეტეს, რომ  ჩვენი მომხმარებლის 70% უცხოელია,“-აცხადებს ზედგენიძე.

როგორც ცნობილია, დაგეგმილია მესხური ოდის პროექტის განხორციელება, სადაც თავმოყრილი იქნება ძველი მესხური არქიტექტურა, ხის ბანიანი სახლებით.

„თუ სასტუმროზე მოთხოვნა გაიზრდება გვინდა მესხური სოფლის პატარა პროტოტიპი გავაკეთოთ. ეს იქნება  8-10 საცხოვრებელი ტიპის სახლები,ტერასულად. ამ ეტაპზე ეს არის იდეა და გვინდა, მომდევნო წლებზე ამაზე გვქონდეს ორიენტაცია,“ - აცხადებს ზედგენიძე. პროექტი დაახლოებით ნახევარი მილიონი ლარის ინვესტიციას საჭიროებს.  

რაც შეეხება საფირმო მაღაზიას, მისი გახსნა  თბილისის ერთ-ერთ ძველ უბანში  იგეგმებოდა. განიხილებოდა მარჯანიშვილის ან დავით აღმაშენებლის გამზირის  მიმდებარე ტერიტორია.

ამ დროისთვის კომპანია 7 დასახელების ქვევრის ლუდს აწარმოებს. 0.5 ლ მოცულობის ბოთლებში ჩამოსხმული ლუდი აგროჰაბისა და გუდვილის ქსელში იყიდება.

კომპანიამ ასპინძაში  2021 წლის სექტემბერში დასასვენებელი კომპლექსი გახსნა. “მელუდის სახლში“ განთავსებულია როგორც ლუდის სპა ცენტრი, ისე სასტუმრო.

შეგახსენებთ, ქვევრის ლუდის მცირე საწარმო ასპინძის რაიონში 2016 წლიდან ფუნქციონირებს.