მერიკო გუბელაძე: თუ ვაქცინაცია სავალდებულო არ იქნება, 10 წლის შემდეგ 35-ე ტალღაზეც ვიქნებით
ცნობილი რესტორატორი მერიკო გუბელაძე „ბიზნესპარტნიორთან“ აცხადებს, რომ აუცილებელია მთავრობამ ვაქცინაცია სავალდებულო გახადოს, წინააღმდეგ შემთხვევაში ქვეყანაში პანდემია კიდევ დიდი ხანი იარსებებს.
„მოვიარე საფრანგეთი, თურქეთი და სტამბულში საზოგადოებრივ ტრანსპორტში არ ამიშვეს იმიტომ, რომ იმათმა სისტემამ ჩვენი შტრიხ კოდი არ წაიკითხა.
იმედი მაქვს, ეყოფათ ჭკუა და სავალდებულო იქნება ვაქცინაცია, ვისაც არ უნდა აცრა, დაჯდეს სახლში, აღარ უნდა შევიდეს არც მაღაზიაში, არც ტრანსპორტში და არც რესტორანში. ეს იქნება ლოგიკური გაგრძელება. ასე არის მთელი მსოფლიო და ასე აცრა საფრანგეთმა მოსახლეობის 83%. ესენი თუ დაჯდებიან და დაელოდებიან, პირობითად, „მაყვალა“ როდის მიხვდება რომ აცრა აუცილებელია და აიცრება, ჩვენ 10 წლის შემდეგ 35-ე ტალღაზეც ვიქნებით.
მე ჩემს რესტორნებში აუცრელ მომხმარებელს და PCR ტესტის არ მქონეს არ ვიღებ. ეს წესი დავაწესე, ჩემი სფერიდან ამაზე არავინ არ წამომყვა,თუ სახელმწიფო დააწესებს ამ ვალდებულებას, შემდეგ უკვე სხვა გზა არ ექნებათ, ყველას მოუწევს ამის გაკეთებას. ეს არის გამოსავალი, ეს მოიფიქრა ევროპამ, ამერიკამ და საკმაოდ წარმატებულადაც მუშაობს,“-აცხადებს გუბელაძე.
როგორც ცნობილია, რესტორატორი მერიკო გუბელაძე „შავი ლომის“ და „ლეილას“ მფლობელია. რაც შეეხება „ლისი ლაუნჯის“, ობიექტი პანდემიის გამო დაიხურა და აღარ გახსნილა.
საკოორდინაციო საბჭოს გადაწყვეტილებით, 6 ოქტომბრიდან ქვეყანაში არსებული ეპიდემიოლოგიური ტენდენციების გათვალისწინებით, კვების ობიექტების მუშაობა ერთი საათით გახანგრძლივდა და მათ 22:00 საათის ნაცვლად, მუშაობა 23:00 საათამდე შეუძლიათ.
რაც შეეხება სავალდებულო ვაქცინაციას ჯანდაცვის მინისტრის მოადგილემ დღეს განაცხადა, რომ აცრა სამედიცინო ინტერვენციაა, რომელიც სავალდებულო ვერ იქნება. თამარ გაბუნიას განმარტებით, მოთხოვნები შეიძლება დააწესოს ბიზნესმა ეპიდემიოლოგიური უსაფრთხოებიდან გამომდინარე, თუმცა ადამიანებს უნდა ჰქონდეთ თავისუფალი არჩევანი.
"ის, რომ ბიზნეს გარემოში შეგვიძლია მოთხოვნები დავაწესოთ მოიცავს არჩევანის თავისუფლებას, რაც გულიხსმობს ვაქცინაციას, ტესტირებას და პირბადის გამოყენებას. ადამიანს უფლება აქვს სამედიცინო ინტერვენციის შესახებ თავად მიიღოს გადაწყვეტილება. შესაბამისად, მოთხოვნები არჩევანის უფლებას უნდა მოიცავდეს“, - განაცხადა თამარ გაბუნიამ.
