მეგასპორტი: ცივილური იქნება, თუ მოლებში მხოლოდ ვაქცინირებულები დაიშვებიან
საქართველოში მსოფლიო ბრენდების North Face-ის, Timberland-ისა და Disel-ის ოფიციალური წარმომადგენელი კომპანია „მეგასპორტის“ დამფუძნებელი დავით ჩხეიძე აცხადებს, რომ ძალიან ცივილური იქნება, თუ სავაჭრო ცენტრებსა და მაღაზიებში მხოლოდ ვაქცინირებულ ადამიანები შეძლებენ შესვლას.
„მთელი ევროპა და ამერიკა ასე მუშაობს, თუმცა საქართველოში ეს განხორციელებადი არ არის, რადგან ეს საკითხი კომპლექსურ მიდგომას საჭიროებს. თუ ამ გადაწყვეტილებას მივიღებთ, მაშინ პროცესში უნდა ჩაერთოს ყველა მხარე - ბრენდული მაღაზიის წარმომადგენლები, მოლების ადმინისტრაცია და სავაჭრო ცენტრში შემომსვლელი საზოგადოება. ანუ ყველა მხარე აცრილი უნდა იყოს. ამაზე შეთანახმება თავისუფლად შეიძლება. თავიდან ექნება ნეგატიური ეფექტი - შედარებით შემცირდება გაყიდვები, თუმცა გრძელვადიან პერსპექტივაში დადებითი ეფექტის მოტანა შეუძლია,“ - აცხადებს ჩხეიძე.
შეგახსენებთ, რამდენიმე დღის წინ ცნობილმა შეფ-მზარეულმა და რესტორნების ქსელის მფლობელმა თეკუნა გაჩეჩილაძემ „ბიზნესპარტნიორთან“ განაცხადა, რომ რესტორატორები კვების ობიექტებში მხოლოდ ვაქცინირებული მოქალაქეების დაშვებასთან დაკავშირებით ინიციატივით გამოდიან. საკითხზე მოლაპარაკებები მიმდინარეობს, საბოლოო გადაწყვეტილება კი უახლოეს მომავალში იქნება მიღებული.
