მაგთი: ჩვენს ქსელურ ინფრასტრუქტურაზე განხორციელებულ კიბერშეტევაზე შსს-მ გამოძიება დაიწყო
მაგთიკომი საკუთარ ქსელურ ინფრასტრუქტურაზე განხორციელებულ კიბერშეტევაზე აცხადებს. კომპანიის განმარტებით, შსს-ს ცენტრალური კრიმინალური პოლიციის დეპარტამენტის კიბერდანაშაულთან ბრძოლის სამმართველომ მომხდარ ფაქტზე გამოძიება დაიწყო.
კომპანია ამავდროულად იმედს გამოთქვამს, რომ გამოძიება წარმატებულად წარიმართება.
"შაბათს, 10 ივლისს, მაგთიკომის ქსელურ ინფრასტრუქტურაზე მძლავრი კიბერშეტევა განხორციელდა. ამის შედეგად შეფერხებით მუშაობდა მაგთიკომის სერვის ცენტრები, ცხელი ხაზი და ზოგიერთი დისტანციური მომსახურება. მაგთიკომის გუნდის მიერ იმავე დღეს სრულად იქნა აღმოფხვრილი კიბერთავდასხმის ნეგატიური შედეგები.
მაგთიკომმა ოპერატიულად ჩააყენა საქმის კურსში ყველა შესაბამისი სახელმწიფო უწყება კომპანიის კუთვნილ სასერვერო ინფრასტრუქტურაზე თავდასხმის ფაქტზე, ხოლო შინაგან საქმეთა სამინისტროს ცენტრალური კრიმინალური პოლიციის დეპარტამენტის კიბერდანაშაულთან ბრძოლის სამმართველომ მომხდარ ფაქტზე გამოძიება დაიწყო. ვიმედოვნებთ, რომ ერთობლივი ძალისხმევის შედეგად, გამოძიება წარმატებულად წარიმართება და შესაძლებელი გახდება დამნაშავეების იდენტიფიცირება. ამასთან, მაგთიკომი მის პარტნიორ კომპანიებთან (შესაბამისი აპარატურის და პროგრამული უზრუნველყოფის მწარმოებელი კომპანიები) ერთად, განაგრძობს გაზრდილი კიბერუსაფრთხოების რისკების მინიმიზაციის მიზნით აქტიურ თანამშრომლობას", - განმარტებულია კომპანიის განცხადებაში.
