ლევან ყარალაშვილი: უნიკალური პოზიციონირება გვაქვს და ინვესტორებთან ეს უნდა წარმოვაჩინოთ
სავაჭრო ცენტრების ასოციაციის ხელმძღვანელი აცხადებს, რომ საერთაშორისო დონეზე საქართველოს საინვესტიციო მიმზიდველობის გაცნობას სათანადო ყურადღება არ ეთმობა.
როგორც ლევან ყარალაშვილმა „ბიზნესპარტნიორის ოთხეულში“ განმარტა, ქვეყნის შესახებ ტოტალურად ნეგატიური ინფორმაცია ვრცელდება.
„სამი კვირის წინ მომიწია ყოფნა ემირატებში, სადაც გვყავს ბიზნესპარტნიორები. პროექტებზე საუბრისას პარტნიორმა ინგლისურენოვანი საიტები გაგვიხსნა, სადაც საქართველოს შესახებ მხოლოდ ტოტალური ნეგატივია: პანდემია, პოლიტიკური და ეკონომიკური კრიზისი, კურსის გაუფასურება. გაუკვირდა ადამიანს, ამ ფონზე რა ინვესტიციის განხორციელებაზე მელაპარაკებითო.
დღეს სისტემურად არავინ მუშაობს, რომ საქართველოს პოზიციონირება მოხდეს როგორც ჯერ კიდევ ნორმალური და საინტერესო ქვეყნის. ორი ეკონომიკური კრიზისი გამოვიარეთ. ნებისმიერ კრიზისს მოაქვს შესაძლებლობა. ჩვენ გვაქვს მართლაც უნიკალური პოზიციონირება. თავისუფალი სავაჭრო ურთიერთობები, ამ თემაზე მსხვილ ქვეყნებთან თუ არ იმუშავა სახელმწიფომ, ამას ვერც მცირე-საშუალო ბიზნესი მოერევა და ვერც სხვა. ამ მიმართულების დეფიციტია ნამდვილად. როგორც ინფორმაციის მიწოდების, ინვესტორებთან ლაპარაკის, ისე ოპტიმიზმის შექმნის, რომ ქვეყანა ძალიან სწრაფად დაძლევს ამ კრიზისს. ტურისტები თუ ინვესტორები უნდა დავარწმუნოთ, რომ საქართველოში ჩამოსვლა არის უსაფრთხო, აქ ჩამოსული ადამიანი არ აიკიდებს კოვიდს. მას მოემსახურება ვაქცინირებული "სტაფი" და რისკების წინაშე არ დადგება," - განაცხადა ლევან ყარალაშვილმა.
