ლევან ყარალაშვილი: კომენდანტის 23:00 საათამდე გადაწევით სავაჭრო ცენტრების ბრუნვა 10-15%-ით გაიზრდება

„სავაჭრო ცენტრების ასოციაციის“ ხელმძღვანელი აცხადებს, რომ კომენდანტის საათის 2 საათით გადაწევით სავაჭრო ცენტრების ბრუნვა 10-15%-ით გაიზრდება.

როგორც ლევან ყარალაშვილმა გადაცემაში „ბიზნესპარტნიორის ოთხეული“ განმარტა, ამ მოცულობის ზრდის მიღწევა ბიზნესისთვის კრიტიკული მნიშვნელობისაა.

„ჩვენ გვაქვს ყოველსაათობრივი სტატისტიკა და კომენდანტის საათის გადაწევით სავაჭრო ცენტრების ბრუნვა 10-15%-ით გაიზრდება. ეს ჩვენთვის ძალიან კრიტიკული რიცხვია.

მარტო „თბილისი ცენტრალში“ განთავსებული ობიექტების ბრუნვა ამ ეტაპზე არის 250 მლნ ლარი. პლუს 10% რომ ავიღოთ, მინიმუმ 25 მილიონი მოგვემატება. მომხმარებელთა მხრიდან საღამოს საათებში არის მაქსიმალური მოთხოვნა. კომენდანტის საათის გადაწევით კი მათ მოთხოვნის დაკმაყოფილებისთვის მეტი დრო ექნებათ. ადრე საშუალოდ, ჩვენი ცენტრების დღიური ვიზიტორების რაოდენობა იყო 30 000. ამ ეტაპზე არის 10 000.

საახალწლოდ დღიური ვაჭრობა იყო დაახლოებით 1.5-2 მლნ, ეს მაჩვენებელი ამ ეტაპზე ჩამოსული იყო 300 ათასამდე. ასე რომ, ყველა საათს აქვს მნიშნელობა. ეს ორი საათი რესტორნების შემთხვევაში კიდევ უფრო კრიტიკულია. მაისი იყო დასაწყისი, რომ ტურისტები შემოსულიყვნენ ქვეყანაში. სახლში გამოკეტო ტურისტი და გარეთ ვერ გამოვიდეს ცხრა საათიდან, რა აზრი აქვს მის ჩამოსვლას?!-აღნიშნა ლევან ყარალაშვილმა.