"ლეგატო" "მწვანე პასპორტების" მექანიზმს სასამართლოში აპროტესტებს

„ლეგატო“   „მწვანე პასპორტების“ მექანიზმს სასამართლოში აპროტესტებს, შრომის ინსპექციის მიერ დაწესებულ 10 000 ლარიან ჯარიმას კი განაჩენის გამოტანამდე არ აპირებს.

კომპანიის დამფუძნებელი მანანა ანჯაფარიძე “ბიზნესპარტნიორთან“ აცხადებს, რომ "მწვანე პასპორტის" მოთხოვნა დისკრიმინაციულია და ისინი ამ რეკომენდაციას არ ემორჩილებიან. შესაბამისად, კომპანია ნაწილობრივ დაიხურა, სტუმრებს დარბაზებში აღარ იღებს, მოქმედებს მხოლოდ გატანის სერვისი.

„გავასაჩივრებთ ჯარიმას და სარჩელს შევიტანთ როგორც საკონსტიტუციო, ისე - საქალაქო სასამართლოში. რა გადაწყევტილებასაც მიიღებს სასამართლო, იმის მიხედვით მოვიქცევით. ეს არის ჩვენი პროტესტი. მიგვაჩნია, რომ ეს არის არაჰუმანური და არაკონსტიტუციური, ადამიანის უფლებების დამრღვევი და დისკრიმინაციული,“ - აცხადებს ანჯაფარიძე.

კომპანიას ამ ეტაპზე თბილისში 3  ფილიალი აქვს. 

შეგახსენებთ, საქართველოში 2021 წლის 1-ლი დეკემბრიდან „მწვანე პასპორტის“ სქემა მოქმედებს. შედეგად, გარკვეულ ობიექტებში, მათ შორის რესტორნებში, ბარებში, კაფეებში, მოქალაქეებს მხოლოდ ვაქცინირების, ან ნეგატიური ტესტის პასუხის შემთხვევაში შეუძლიათ შესვლა.