კრიალა: ჰიგიენური ქაღალდისთვის საჭირო ნედლეული გლობალურ ბაზარზე დეფიციტურია
ქართული, ეკოლოგიურად სუფთა ჰიგიენური ქაღალდის მწარმოებელი კომპანია „კრიალას“ გენერალური დირექტორი კახა ხუციბერიძე „ბიზნესპარტნიორთან“ აცხადებს,რომ რუსეთ-უკრაინის ომის გამო კომპანიას მოუწია პროდუქციის წარმოებისთვის საჭირო ნედლეულის (ცელულოზას) იმპორტი თურქეთის ნაცვლად, ბელორუსიიდან განახორციელოს.
„ცელულოზას შესყიდვასთან მიმართბეით პრობლემები გლობალურადაა შექმნილი. კოფლიქტმა სერიოზული გვალენა მოახდინა, რადგან ცელულოზას საწარმოებლად რუსული რესურსი გამოიყენებოდა. ჩვენი ძირითადი პარტნიორები თურქები იყვნენ,რომლებიც ამ ნედლეულს ვეღარ იღებენ. თურქეთში ამის გამო ძალიან ბევრი საწარმო გაჩერდა. ჩვენ ალტერნატიული ბაზარი გავჭერით ბელორუსზე, თუმცა, მასალა აქედანაც შეფერხებებით მოდის,“-აცხადებს ხუციბერიძე.
მისივე ინფორმაციით,შექმნილი მდგომარეობის გამო საკმაოდ გაზრდილია, თითქმის გაორმაგებულია ჩვენი პროდუქტისთვის საჭირო ნედლეულის - ცელულოზას ფასი. ხუციბერიძე აცხადებს, რომ სწორედ ამის გამო „კრიალას“ გაეზარდა თვითღირებულება, შესაბამისად, კომპანიას მიმდინარე წლის მარტი-აპრილიდან პროდუქციაზე ფასის ზრდა მოუწია.
როგორც ხუციბერიძე აღნიშნავს, „კრიალას“ აქტივაცია გაყიდვების კუთხით საკმაოდ მზარდია.
საწარმოში, რომელიც 60-მდე დასახელების პროდუქციას უშვებს, წარმოების მოცულობა მუდმივად მზარდია. ხუციბერიძის ინფორმაციით, „კრიალას“ პროდუქცია სრულად ადგილობრივ ბაზარზე იყიდება.
„კრიალას“ გენერალური დირექტორი იმპორტირებულ პროდუქციასთან კონკურენციაზეც საუბრობს და აცხადებს, რომ ქართული პროდუქცია იმპორტირებულს ფასით უწევს კონკურენციას.
ქართული, ეკოლოგიურად სუფთა ჰიგიენური ქაღალდის მწარმოებელი კომპანია „კრიალა“ ბაზარზე 2014 წელს გამოჩნდა. საწარმო თბილისში, აფრიკის დასახლებაში მდებარეობს.
