კლუბი "მტკვარზე": ტურიზმში მიმზიდველი სიტუაცია ნამდვილად არ არის
კლუბი „მტკვარზე“ თანადამფუძნებელი ქეთა გაბუნია „ბიზნესპარტნიორთან“ ზაფხულის სეზონის მოლოდინებზე საუბრობს და აცხადებს, რომ მენეჯმენტმა
კლუბი "მტკვარზე" ობიექტი თბილისის გარდა ბათუმშიც გახსნა, თუმცა, როგორც მენეჯმენტი აცხადებს, ზღვისპირა სანაპიროს ობიექტთან დაკავშირებით მოლოდინი არ გამართლდა.
„ზაფხულის სეზონიდან გამომდინარე თბილისში ამ დროისთვის შედარებით მცირე ზომის ღონისძიებები გვაქვს. ჩვენ კი ვფიქრობთ და გვეუბნებიან, რომ ტურიზმი აღდგა, თუმცა, სინამდვილეში საქმე გვაქვს რუს ვიზიტორებთან, რომლებიც აქ დასასახლებლად ჩამოდიან, ისინი ტურისტები არ არიან.
ბათუმში სეზონი ადრე გავხსენით იქიდან გამომდინარე, რომ ვფიქრობდით ქალაქში ბევრი ხალხი იყო და კარგად ვიმუშავებდით. საბოლოო ჯამში, ის შედეგი არ არის, რასაც ველოდით. ისე არ არის, რომ ფინანსურად მძიმე მდგომარეობა გვქონდეს, თუმცა, მიმზიდველი სიტუაცია ნამდვილად არ არის,“ - აცხადებს გაბუნია.
მისი ინფორმაციით, ხალხის მოლოდინი გაცილებით მაღალი იყო.
„რუსები საქართველოში ფულის დასახარჯად კი არა, გასაკეთებლად უფრო არიან. პირდაპირ შეგვიძლია ვთქვათ, რომ წელს არ არის ტურისტული სეზონი. ესენი თავიანთ ბიზნესებს ამუშავებენ, გახსნეს თავიანთი მაღაზიები, კაფეები, ბარები და საერთოდ არ ეკარებიან ქართველების სივრცეებს. მით უმეტეს, ისეთ ადგილებს სადაც ოდნავ მაინც შეინიშნება უკრაინისადმი მხარდაჭერა,“ - აცხადებს გაბუნია.
მისივე განცხადებით, ბათუმში კლუბი „მტკვარზე“ ობიექტს ძირითადად, ბათუმელები და თბილისელები სტუმრობენ. მხოლოდ მცირე ნაწილია საერთაშორისო ტურისტები.
კლუბი „მტკვარზე“ თანადამფუძნებელი შექმნილ სიტუაციას რუსეთ-უკრაინის ომს უკავშირებს.
