ქართველ მწარმოებელებს ევროკავშირის ბაზარზე პროდუქციის ექსპორტის გაზრდის შანსი აქვთ
რუმინეთის ქალაქ კონსტანცაში ლოგისტიკური ჰაბი შეიქმნა, რომელმაც საქართველოდან ევროკავშირში ექსპორტი უნდა გაამარტივოს.
როგორც ევროკავშირი-საქართველოს ბიზნეს საბჭოში აცხადებენ, ლოგისტიკური ჰაბი უკვე მზადაა პროდუქციის დასაწყობებისთვის. ეს კი ქართველ ექსპორტიორებს შესაძლებლობას აძლევთ, რომ პროდუქცია სწორედ ამ წერტილიდან ევროკავშირის ქვეყნებს მარტივად მიაწოდონ.
„ეს ძალიან მნიშვნელოვანი მოვლენაა. ჩვენი საბჭოს ხელშეწყობით, ამ პროექტს რუმინული კომპანია DTS LOGISTIC-ი ახორციელებს. ტვირთის ევროკავშირის ქვეყნებისთვის მიწოდებასაც თავადვე უზრუნველყოფს. ტვირთების შეკრება ფოთსა და თბილისში მოხდება და ის კონტეინერებით შავი ზღვის მეშვეობით გაიგზავნება. ლოგისტიკური ჰაბის ამოქმედება ექსპორტზე ორიენტირებულ კომპანიებს ტრანსპორტირების ხარჯებს შეუმცირებს და განბაჟებისა თუ სხვა პროცედურების გავლისთვის საჭირო დროს დაუზოგავს. აღსანიშნავია ისიც, რომ ამ ეტაპზე საუბარია მხოლოდ ისეთ საკონტეინერო ტვირთების გადაზიდვა-დასაწყობებაზე, რომელიც ტემპერატურული რეჟიმის კონტროლს არ გულისხმობს,“ - განაცხადა ევროკავშირი-საქართველოს ბიზნეს საბჭოს" აღმასრულებელმა დირექტორმა, გიორგი კაჭარავამ.
