ქართული სადისტრიბუციო მარკეტინგული კომპანია "ლევორის" 44,995% წილს შეიძენს
„ქართული სადისტრიბუციო მარკეტინგული კომპანია" „ლევორის" 100% წილის მფლობელისაგან 44,995% წილს შეიძენს.
კონკურენციის ეროვნულმა სააგენტომ კონცენტრაციაზე თანხმობა უკვე გასცა.
სააგენტოს ცნობით, კონცენტრაციის მონაწილე მხარეები მოქმედებენ სხვადასხვა ბაზარზე. „ქართული სადისტრიბუციო მარკეტინგული კომპანია" ალკოჰოლური სასმელების და სხვადასხვა საკვები პროდუქტების რეალიზაციითაა დაკავებული, „ლევორი" კი საოჯახო ჭურჭლით და საყოფაცხოვრებო ნივთებით ვაჭრობს.
მიღებული და დამუშავებული მასალების შესწავლის შედეგად სააგენტომ დაადგინა, რომ „ქართულ სადისტრიბუციო მარკეტინგულ კომპანიასა" და „ლევორს" შორის დაგეგმილი კონცენტრაცია არ ზღუდავს ეფექტიან კონკურენციას საქართველოს ან მისი ნაწილის სასაქონლო ან მომსახურების ბაზარზე და თავსებადია კონკურენტულ გარემოსთან.
კანონმდებლობის შესაბამისად, სააგენტოსათვის წინასწარ სავალდებულო შეტყობინებას ექვემდებარება კონცენტრაცია, თუ მისი მონაწილე პირების ერთობლივი (ჯამური) წლიური ბრუნვა საქართველოს ტერიტორიაზე, შეტყობინების წარმოდგენის ვალდებულების წარმოშობის წინა ფინანსური წლის მდგომარეობით, აღემატება 20 მილიონ ლარს და, ამასთან, კონცენტრაციის მონაწილე მინიმუმ ორი პირიდან თითოეულის წლიური ბრუნვა აღემატება 5 მილიონ ლარს.
კონკურენციის ეროვნულმა სააგენტომ 2021 წელს 2 კონცენტრაციაზე თანხმობა გასცა. ამ ეტაპზე, 1 საქმეზე ადმინისტრაციული წარმოება მიმდინარეობს. განახლებული კანონმდებლობის ფარგლებში, სააგენტოს მიერ შესწავლილ იქნა სულ 16 552 კონცენტრაცია.
