ქართული "სადილი" ივლისიდან კანადის სუპერმარკეტებში გაიყიდება
ქართული მზა სადილი მომდევნო თვიდან კანადაში გაიყიდება.
მოლაპარაკებები დასრულებულია და "ჯეო ნატურალსმა" პარტია ექსპორტზე უკვე გააგზავნა.
საერთაშორისო ბაზარზე გააქტიურების პარალელურად ფართოვდება ადგილობრივი წარმოებაც. მზა სადილს კიდევ სამი ახალი სახეობა დაემატება.
“ამჟამად ვაწარმოებთ 12 სახეობის მზა სადილს, მაგრამ თვის ბოლოსთვის კიდევ 3 ახალ დასახელებას გავუშვებთ გაყიდვაში. შეთანხმებას მივაღწიეთ ექსპორტთან დაკავშირებითაც, გაგვაქვს სოკოს სადილები სხვადასხვა სოუსით. პანდემიის მიუხედავად, შევძელით პროდუქციის კანადაში გატანა. პროდუქცია დაახლოებით ერთი თვეა უკვე გაგზავნილია. ახლო მომავალში მორიგ პარტიასაც გავაგზავნით და ჩვენი პროდუქცია მომავალ თვეში უკვე იქაურ სუპერმარკეტებში გაეშვება,“ - განმარტავს კომპანიის მარკეტინგის დირექტორი გიორგი თუთბერიძე.
აღსანიშნავია, რომ პანდემიამ "ჯეო ნატურალსს“ წარმოების ღირებულება საშუალოდ 20%-ით გაუძვირა. მიზეზი იმპორტირებული ნედლეულზე ფასის ზრდა და პანდემიით გამოწვეული ლოჯისტიკური პრობლემებია.
„პანდემია საკმაოდ დიდი პრობლემა აღმოჩნდა ჩვენთვისაც. ქვეყნის ჩაკეტვამ, მიმოსვლის შეზღუდვამ გარკვეული პრობლემები გამოიწვია. იქიდან გამომდინარე რომ გარკვეული ნედლეულის იმპორტს ვახორციელებთ ლარის კურსის არასტაბლურობამ წარმოება გაგვიძვირა. გაძვირდა კომუნალური გადასახადი და ეს ყველაფერი საკმაოდ პრობლემურია ერთიანობაში,“- ამბობს გიორგი თუთბერიძე.
ცნობისთვის, "ჯეო ნატურალსი“ პროდუქციას დედოფლისწყაროს მუნიციპალიტეტში 2017 წლიდან აწარმოებს. „სადილის“ ბრენდის ქვეშ ყოველდღიურად 10 000 ქილა პროდუქტი იწარმოება. ქარხანაში დასაქმებული ადგილობრივების რიცხვი კი 70-ს აჭარბებს. საწარმო სახელმწიფოს საგრანტო კომპონენტის ბენეფიციარია.
