"ქართული პორტების გამოწვევა ევროპის ქვეყნებთან რეგულარული საბორნე მიმოსვლის ნაკლებობაა"
„ევროკავშირის ქვეყნებთან ლოგისტიკა და სატრანსპორტო ურთიერთობები ნამდვილად არ შეესაბამება იმ დონეს და დინამიკას, რაც ჩვენ სავაჭრო ურთიერთობას გააჩნია,“ - ამის შესახებ „ბიზნესპარტნიორის ოთხეულში“ ეკონომიკისა და მდგრადი განვითარების მინისტრმა განაცხადა.
ნათია თურნავას განმარტებით, ქართული პორტების გამოწვევა ევროპის ქვეყნებთან რეგულარული საბორნე მიმოსვლის ნაკლებობაა.
„ევროკავშირი ჩვენი ყველაზე მსხვილი სავაჭრო პარტნიორია. ეს სავაჭრო ურთიერთობა არის გამოხატული რიცხვებში, რაც ექსპორტში 22%-ს, ხოლო იმპორტში 24-ს შეადგენს. ლოგისტიკა და სატრანსპორტო ურთიერთობები ნამდვილად არ შეესაბამება იმ დონეს და დინამიკას, რაც ჩვენ სავაჭრო ურთიერთობას გააჩნია. მაგალითად, საქართველოსა და რუმინეთის პორტებს შორის რეგულარული საბორნე მიმოსვლა, სამწუხაროდ, არ არსებობს. იგივე ეხება საქართველოსა და ბულგარეთს შორის კავშირებს, ასევე საქართველოსა და უკრაინას შორის კავშირებს. 2019 წელს გავაკეთეთ კვლევა, რომელმაც აჩვენა, რომ სატრანსპორტო პრობლემების მოგვარება ორმხრივად საინტერესო და მომგებიანია. შესაბამისად, იმედი გვაქვს, რომ კერძო სექტორიც ჩაერთვება ამ პროექტებში. თუმცა ეს პროექტები რომ გახდეს უფრო რეალისტური, სახელმწიფოს ჩართულობა კერძო-საჯარო პარტნიორობის პრონციპით, აუცილებელია,“ - განაცხადა ნათია თურნავამ.
