ჯანდაცვის სექტორის წარმატებული სეგმენტი - კარდიოლოგიური კლინიკები და მათი შემოსავლები
ჯანდაცვის სექტორში კარდიოლოგია ერთ-ერთ ყველაზე წარმატებულ სეგმენტად მიიჩნევა. ამ სექტორში არაერთი წარმატებული კლინიკა ოპერირებს.
„ბიზნესპარტნიორმა“ რამდენიმე კლინიკის 2019 წლის ფინანსურ ანგარიშს გადახედა:
ჩაფიძის სახელობის გადაუდებელი კარდიოლოგიის ცენტრს 2019 წელს შემოსავლები გაზრდილი ჰქონდა. მაღალტექნოლოგიურმა ცენტრმა 2019 წელს 21.34 მლნ ლარის შემოსავალი მიიღო, 2018 წელს არსებული 20.70 მლნ შემდეგ. წლის მოგება 835 ათასი ლარი იყო. 2018 წელს 276 ათასი ლარის ზარალი ფიქსირდებოდა.
„კარდიოლოგიური კლინიკა გულის“ წლიური შემოსავალი 8.194 მლნ ლარი იყო, ზრდა წინა წელთან შედარებით 2.6 მილიონით მეტი, ვიდრე 2018 წელს. წლის მოგება 647.13 ათასი ლარი იყო, გაუნაწილებელი წმინდა მოგება კი, 5.687 მლნ შეადგენს.
„თბილისის გულის ცენტრის“ შემოსავალი 6.48 მლნ ლარი იყო, წმინდა მოგება 514.167 ათასი, ჯამური გაუნაწილებელი მოგება 1.53 მილიონია.
რაც შეეხება „ბოხუას სახელობის კარდიოვასკულარული ცენტრს”, კომპანიის შემოსავლები შემცირებული იყო 13.8 მლნ ლარიდან 12.479 მლნ ლარამდე. წლის ზარალი 208 ათასი ლარი იყო, 2018 წელს არსებული 1.25 მლნ მოგების შემდეგ.
ბოლო 1 წლის განმავლობაში, სამედიცინო სექტორი არაერთხელ მოექცა მედიის ყურადღების ქვეშ. სამედიცინო ბიზნესში ჩართული პირების ხმაურიანი განცხადებები განსაკუთრებით ჯანდაცვის სამინისტროს ე.წ 520 დადგენილებამ გამოიწვია, რომელიც ჯერ კიდევ 2019 წლის ბოლოს ამოქმედდა.
დადგენილებამ, რომელიც საყოველთაო ჯანდაცვის პროგრამაში ჩართულ სამედიცინო დაწესებულებებს ავალდებულებს პაციენტებს სერვისები სახელმწიფოს მიერ დადგენილი ერთიანი ტარიფით მიაწოდონ, ვნებათაღელვა კარდიოლოგიის მიმართულებაში გამოიწვია. სექტორის წარმომადგენლები ამბობენ, რომ ეს წესები ყველაზე ნეგატიურად სწორედ კარდიოლოგიაზე აისახება. როგორი იყო 2020 წელს ამ მოთხოვნების გავლენა კარდიოლოგიურ კლინიკებზე ეს მომავალ წელს გამოჩნდება.
