ინდუსტრია ქათმის ხორცსა და კვერცხზე ფასების მატებას ელის

მეფრინველეობის სექტორი ქათმის ხორცისა და კვერცხის ფასების მორიგ მატებას არ გამორიცხავს. როგორც „კუმისის“ დამფუძნებელმა „ბიზნესპარტნიორს“ განუცხადა, ფასების მატების რამდენიმე მიზეზი არსებობს. მათ შორისაა, ფრინველის საკვებად საჭირო მარცვლეულის ღირებულების ზრდა, ასევე საწვავის გაძვირების ფონზე ლოგისტიკური ხარჯების მნიშვნელოვანი მატება.

„70% ჩვენი პროდუქტის თვითღირებულების არის საკვების ფასი, 20 წელია მეფრინველეობაში ვარ და მარცვლეულზე ასეთი მაღალი ფასები არ მახსოვს. ბოლო ერთი წლის განმავლობაში ფასები ქათმის ხორცსა და კვერცხზე 20%-ით გაიზარდა და სამწუხარო ის არის, რომ ეს ბოლო ფასნამატი არ იქნება. საქართველოში ელექტროენერგიაც გაძვირდა, თითქმის გაგვიორმაგდა ჩვენ. ახლა კი ვსარგებლობთ სუბსიდირებით, მაგრამ წლის ბოლოსკენ ეს სუბსიდირების პროგრამაც მთავრდება. კიდევ ერთი მნიშვნელოვანი კომპნენტი გვიძვირდება. გვინდა არ გვინდა ისევ მოგვიწევს ფასების გადახედვა,“ - განმარტავს ზურაბ უჩუმბეგაშვილმა.

ფასების მატებას ელიან „კოდაშიც.“ როგორც კომპანიის გენერალურმა დირექტორმა განმარტა, „კოდამ" ბოლო პერიოდში ხორცისა და კვერცის ფასი 10-12%-ით გაზარდა, თუმცა იმ პირობებში რომ ფრინველის საკვებად საჭირო მარცვლეულის ფასები მკვეთრად არის გაზრდილი და მოლოდინია, რომ კიდევ უფრო გაიზრდება, კომპანიაში ვარაუდობენ, რომ ოპერირების გაგრძელებისთვის საფასო პოლიტიკის გადახედვა მოუწევთ.

„ხორბლის შეთხვევაში თითქმის დასრულებულია მოსავლის აღება და იმის მაგივრად რომ გაიაფებულიყო პროდუქცია, პირიქით გაძვირდა. ველოდებით სიმინდის მოსავალს, მაგრამ პოზიტიური მოლოდინები არ გვაქვს. უკვე ჩვენც ალბათ, უნდა ვიფიქროთ რომ კიდევ გავაძვიროთ ჩვენი პროდუქცია, სხვა შემთხვევაში ოპერირების გაგრძელებას ვერ შევძლებთ. აქ საუბარი არ არის რაღაც ზემოგებებზე, მთავარია შევძლოთ ოპერირება,“ - განმარტა ზურაბ ჭუჭულაშვილმა.