"იმერმა" საერთაშორისო ბრენდ Marks&Spencer-თან თანამშრომლობა დაიწყო
ქართულმა სამკერვალო კომპანიამ „იმერი“ საერთაშორისო ბრენდ Marks&Spencer-თან თანამშრომლობა დაიწყო.
როგორც „ბიზნესპარტნიორს“ კომპანიის გენერალური დირექტორის მოადგილე ზაზა გვენეტაძემ განუცხადა, ქალის ტანისამოსის მიწოდება უკვე უწყვეტად ხორციელდება.
რაც შეეხება იტალიურ Moncler-ს, ხელშეკრულება უკვე გაფორმებულია, ჩატარებულია აუდიტიც, თუმცა პანდემიის გამო პროდუქციის მიწოდება გაჭიანურდა. გვენეტაძე იმედოვნებს, რომ ქვეყანაში ეპიდემიოლოგიური მდგომარეობა დასტაბილურდება და ქართულ პროდუქციას იტალიაში სექტემბრიდან გააგზავნიან.
მისივე ინფორმაცით, ამჟამად კომპანია ქალის სამოსს კერავს Lebek-ისთისაც. კომპანია გერმანული ბრენდისთვის პალტოსა და ნახევარპალტოებს, კაბებს, შარვალებსა და პიჯაკებს აწვდის. კომპანიის მიერ წარმოებული პროდუქცია სრულად ექსპორტზე გადის.
სამკერვალო ფაბრიკა „იმერს“ 90 წლის ისტორია აქვს, ბოლო 25 წლის განმავლობაში საწარმო უცხოელი შემკვეთებისათვის მუშაობს. პროდუქციის ძალიან მცირე ნაწილი ადგილობრივ ბაზარზეც (ქუთაისში) იყიდება.
