"გურია ფიშის" კალმახი ქსელურ მარკეტებში იყიდება

საქართველოში წარმოებული კალმახი ქსელურ მარკეტებში  საკმაოდ მოთხოვნადია. პროდუქტი „გურია ფიშის“ ბრენდით იყიდება „კარფურში“, „აგროჰაბში“ და ა.შ.

როგორც „გურია ფიშ ფარმინგის" დამფუძნებელი გიორგი ჩხაიძე „ბიზნესპარტნიორთან“ აცხადებს, ეს არის საცდელი პარტია, რომელმაც თავისუფლად შეიძლება ითქვას, რომ გაამართლა.

რაც შეეხება ორაგულს, მისი რეალიზაცია 2023 წლის ზაფხულიდან დაიწყება.

მისი განცხადებით, იგეგმება ადგილობრივი ბაზარის სრულად ათვისება, რაც კომპანიის წარმადობის დაახლოებით 15% იქნება.

„გამორიცხულია ვინმემ, მათ შორის ნორვეგიამ ფასში კონკურენცია გაგვიწიოს. ხარისხი კი საერთაშორისო სტანდარტის იქნება. დანიელების პროექტი გვაქვს გაკეთებული, ქვირითი ნორვეგიულია, საკვები დანიიდან შემოგვაქვს, ლიფსიტები უბრალოდ ქართულ ჰავაზე გაიზრდებიან. ვგეგმავთ ყველასთან თანამშრობლობას, ვინც ბაზარზე ორაგულის მომხმარებელია, მათ შორის HoReCa სექტორთანაც,“ - აცხადებს ჩხაიძე.

განიხილება გურიაში წარმოებული ნორვეგიული ორგულის ექსპორტზე გატანაც.

პროექტი ითვალისწინებს თევზის თანამედროვე ტექნოლოგიებით წარმოებას წყლის რეზერვუარებში. რეზერვუარები სპეციალური მილის საშუალებით შავი ზღვის წყლით მარაგდება.

კომპანია გრიგოლეთში მდებარეობს. პროექტის ღირებულება 8,5 მლნ ლარია, საიდანაც 5 მლნ ლარი დაფინანსებულია პროგრამის "აწარმოე საქართველოში" ფარგლებში. პროექტი გათვლილია 5 წელზე და კომპანიის მენეჯმენტი ჯამში 200 მლნ ლარის ინვესტირებას გეგმავს. მეურნეობაში 18 ადამიანია დასაქმებული.